Во Битола прва клапа на филмот „Вишновата градина“

Во Битола вчера пристигна екипата што за прв пат во светот на филмско платно ќе го стави краткиот игран филм „Вишновата градина“ од Чехов, во режија на Гоце Димовски. „Филмот ќе се снима на три локации, во офицерскиот дом и кај железничката станица во Битола, како и на брегот од Преспанското Езеро. Радосен сум што за прв пат и во ваква форма во светот, ’Вишновата градина‘ ќе биде биде на филмско платно и што освен во Македонија ќе биде прикажана на фестивалите во Оберхаузен-Германија, Монпеље-Франција и на фестивалот за краток игран филм во Москва“, изјави режисерот на филмот Гоце Димовски.

Краткиот игран филм „Вишновата градина“ е финансиран со средства од Филмскиот фонд на Македонија како проект од јавен национален интерес во програмата за 2010 година. Тоа е и дебитантски проект на режисерот Димовски, кој во досегашната кариера ги потпишал документарните филмови „Времето што убива“, „Средба со монахот“ и „Трендафил и Кунатка“. „Првата клапа на филмот ’Вишновата градина‘ ќе ’падне‘ в сабота во преуредениот офицерски дом во Битола. Главната улоги се доверени на Габриела Петрушевска која ќе го игра ликот на Љуба Андреевна и Мето Јовановски, кој ќе го игра ликот на Арсе“, посочи режисерот Димовски.

„Вишновата градина“ е краток игран филм во македонско-бугарска-француска-српска продукција и во неговата реализација вклучени се продукциските куќи „Молика-филм“ од Скопје, „Cinema Q“ од Софија, „Axel Cinema“ од Париз и „Mobbing pictures“ од Белград. (К.Р.)