Петмина млади признале дека извршиле планирано разбојништво

Скопската полиција го расветли и документира разбојништвото ш��о се случи на 18 октомври на влезот во скопското село Студеничани. Според добиените сознанија, можни сторители се лицата А.Н.(18), Ф.М.(24), А.Б.(17), А.Н.(18) и А.И.(19), сите жители на Студеничани. Осомничените биле повикани во Полициската станица „Драчево“ каде што бил извршен службен разговор со нив и, притоа, го признале делото во целост, како и начинот како го извршиле.

Од разговорот со осомничените било утврдено дека лицето З.О. во еден подолг период временски период преку Интернет контактирал со лице кое се претставило како Нено. Тие се договориле на 18 октомври да се сретнат во Студеничани, а тој од него да земе компакт-диск со антивирус за компјутер. Лицето, кое се претставило како Нено, всушност, бил А.Н., а тој, пак, имал претходен договор со другите лица и со малолетникот А.Б. да извршат разбојништво врз З.О., но претходно да извршат лажно разбојништво врз него. Така, кога оштетениот дошол на договореното место, на влезот во Студеничани, со својата „шкода фелиција“, влегол и А.Н., но тогаш дошле и неговите пријатели. Тие ги отвориле вратите од возилото, а А.И., кој имал нож в рака, и А.Б. го извлекле лажниот Нено, по што го претресле. Тој добил и неколку удари, а му бил одземен мобилен телефон и златна алка, а одземеното Ф.М. го продал на Бит-пазар. (Љ.С.)