Вработена во МВР измамила нотар

Одделението за економски криминал при СВР - Скопје поднело кривична пријава до скопското Јавно обвинителство за четири лица, од кои двајца вработени во МВР, поради постоење сомнение дека сториле кривично дело измама. Според МВР, се работи за лицата Ј.М.(41), К.П.(44), вработен во МВР, М.З.(33) и Ј.М.(50), исто така, вработен во полицијата.

Измамата била извршена така што првоосомничената, со намера да се стекне со противправна имотна корист, односно со куќата што била во сопственост на нејзиниот сопруг, заедно со останатите тројца осомничени на 31 март 2008 година лажно прикажала дека К.П. е нејзин сопруг, довела во заблуда еден скопски нотар. Имено, нотарот извршил солемнизација на договор за подарок со кој оштетениот Ј.Б., во својство на дарувач, наводно, и' го подарил на Ј.М..

Од МВР во целост го потврдуваат настанот што се случил кон крајот на март, а кој на 1 април 2008 година финиширал со барање за промена на сопственост. Имено, за бараната промена осомничената го приложила и солемнизираниот договор за подарок, а бараната промена била реализирана на 24 октомври истата година. (Љ.С.)