Поштарот од Вељуса пронајден обесен кај Русиново

Александар Зифовски (50), вработен во поштата во струмичкото село Вељуса, зав��ера попладне е пронајден обесен на дрво во месноста Дупките, во атарот на беровското село Ратево. Безживотното тело на Зифовски висело на едно дрво, а го забележал жител од селото Русиново. Според првичните сознанија на полицијата и состојбата во која се наоѓал трупот, Зифовски, најверојатно, пред еден месец си го одзел животот.

Исчезнувањето на Зифовски, кој 30 години работел во поштата, го пријави неговото семејство уште на 2 октомври годинава. Бидејќи неговиот автомобил беше пронајден во близина на беровското село Двориште во близина на македонско-бугарската граница, се претпоставуваше дека тој по илегални премини заминал во Бугарија.

Поштенскиот работник за неколку месеци успеал од своите соселани незаконски да заработи околу еден милион денари. Парите од сметките за струја, вода и телефон тој не ги пријавувал во „Македонски пошти“, туку ги присвојувал. Откако некои од граѓаните добиле опомени дека сметките не им се платени, а екипи на ЕВН дошле да ја исклучуваат струјата, тие се пожалиле во поштата во Струмица, по што беше откриен целиот случај. (Е.П.)