Европскиот парламент ќе бара преговори за Македонија

На состанокот ќе се зборува и за медиумите и за слободата на изразување

Стразбур/Брисел - Во Брисел денес почнува Мешовитиот парламентарен комитет ЕУ - Република Македонија, од кој се очекува да испрати повик до Европскиот совет да не го одложува и натаму почетокот на преговорите за членство со нашата држава.

Во препораките уште еднаш ќе бидат „охрабрени владите на Македонија и на Грција да ги интензивираат преговорите во рамките на ООН за да најдат решение за разликите околу името“.

Германскиот европратеник, Јорго Шацимаркакис, инаку претседател на делегацијата на Европскиот парламент за Македонија, најави дека на состанокот ќе треба да се зборува и за печатот и слободата на изразување, како и за развојот на ситуацијата во земјата откако во јуни се изгуби надежта дека ќе почнат преговорите за членство.

Вкупно во нацрт-предлогот се предвидени 23 препораки, кои се однесуваат на реформите во судството, администрацијата, полицијата, меѓуетничките односи, европската интеграција.

Во една од нив, во кои се поздравува воведувањето на безвизниот режим, се забележува дека исполнувањето на одредени услови утврдени во патоказот за визната либерализација остануваат витални, во овој поглед се повикуваат македонските власти да ги зајакнат државните институции за да се спречи приливот на лица што бараат азил во земјите на ЕУ.

Бугарскиот европратеник Евгениј Кирилов најави амандмани што се однесуваат на заштита на бугарските споменици и гробишта на територијата на Република Македонија.

По барање на македонската делегација во Мешовитиот комитет, во предложените препораки има посебен дел и за важноста за развојот на транспортните коридори поврзувањето на земјите од Западен Балкан со Европската унија, како на мултинационалната железничка карго-компанија „Карго10“, во кој се наоѓаат земјите од поранешна Југославија или, пак, отворањето на пазарот за железничкиот сообраќај.

Овие препораки не се дефинитивни, бидејќи тие подлежат на измени при гласањето во вторник. (МИА)