Папандреу побара поддршка за својот кризен кабинет

АТИНА - Премиерот Јоргос Папандреу, под опсада од јавните протести и незадоволството во неговата партија, вчера упати апел до Грците да ги поддржат длабоко непопуларните реформи за штедење и да избегнат катастрофално банкротство. Папандреу зборуваше пред парламентот на почетокот од гласањето за недоверба на својот нов кризен кабинет, пред средбата на министрите за финансии од еврозоната во Луксембург на која се очекува да се додели нова транша помош за спас на Грција.

Папандреу, чиј политички опстанок е доведен во прашање, изјави дека Грција се наоѓа на критична раскрсница и нејзините резерви во готовина наскоро ќе бидат исцрпени без траншата од 12 милијарди евра од Европската унија и од ММФ. „Последиците од насилно банкротство или излез од еврото би биле веднаш катастрофални за домаќинствата, банките и за кредибилитетот на земјата“, изјави тој пред парламентот. Папандреу изврши реконструкција на неговата влада по жестоко несогласување во владејачката партија по заминувањето на тројца пратеници и јавни протести, кои му се закануваат на петгодишниот пакет за нови даночни зголемувања, приватизации и намалувања на трошоците договорени со меѓународните кредитори на Атина.

„Ние сакаме гласање на доверба не поради тоа што бараме жртвено јагне... туку затоа што сакаме да преземеме акција и политичка иницијатива со цел Грција да не зависи од кредиторите во иднина“, изјави Папандреу. Тој рече дека меѓународните кредитори не се импресионирани од сликата за Грците поделени околу реформите.

Демонстрантите ветија дека ќе ги засилат протестите што еруптираат во насилство минатата среда, а синдикатите планираат нови штрајкови за одвраќање на законодавците од намерата да го изгласаат новиот план. Работниците во грчката државна компанија ППЦ посочија дека ќе почнат со 48-часовен штрајк на полноќ, кој би можел да резултира со постојан прекин на снабдувањето со електрична енергија за да се спротивстават на плановите на власта да ја продаде компанијата.

Во обид да се намали непопуларноста на реформите Папандреу вети дека ќе ги исправи неправдите во нивната имплементација и ќе осигури сиромашните да не бидат најсериозно погодени од зголемувањето на даноците. Тој, исто така, наведе дека Грција ќе одржи референдум наесен за реформи за промена на изборниот и на политичкиот систем во земјата.

Папандреу вчера побара поддршка од опозицијата за одбегнување национален банкрот, велејќи дека земјата е соочена пред критичен момент. „Ајде да ја свртиме страницата, да престанеме да се бориме во овие критични времиња, да престанеме да испраќаме слика кон светот дека земјата е растргната“, изјави Папандреу. Тој одговараше на говорот од Антонис Самарас, лидер на конзервативната опозициска партија Нова демократија, кој побара распишување избори и повторно преговарање за меѓународниот пакет за санација за спас на Грција од должничката криза. (Ројтерс)