Ватикан ќе штити од злоупотреба од свештеници преку интернет

ВАТИКАН - Ватикан ќе основа онлајн-центар што ќе помага во заштита на децата и на жртвите од сексуална злоупотреба од свештеници, како дел од напорите да се справи со штетните скандали. Римокатоличката црква се подготвува за голема конференција на оваа тема, што ќе се одржи следниот февруари во Рим. Ватикан им кажа на бискупите да дојдат со насоки за борба против злоупотребата, кои се во согласност со локалните закони.

Центарот ќе нуди насоки за оние што треба да одговорат на случаите на злоупотреба, како и обезбедување информации за жртвите. Нивните совети ќе бидат достапни на германски, англиски, француски, шпански и на италијански јазик. „Онлајн-центарот ќе соработува со медицински институции и универзитети за развој на константен одговор на проблемите предизвикани од сексуална злоупотреба“, изјави монсињор Клаус Петер Францл, од надбискупската дијацеза од Минхен.

Приватни донатори ветиле финансиски средства за одржување на базата на податоци за првите три години. Групите од жртви го критикуваа Ватикан поради неговиот бавен одговор на тврдењата за сексуална злоупотреба од свештеници.

Ватикан изгледа доаѓа на мислење дека мерките преземени од раководството на Католичката црква во Англија и во Велс во изминатата деценија за справување со сексуалните злоупотреби на деца од свештеници би можеле да обезбедат модел што другите земји може да го следат. (Би-Би-Си)