Претходен број

Болестите, пестицидите и предавателите се главни причини за намалување на бројот на пчелите

Гојко Ефтоски

ТЕТОВО - Три причини влијаат на намалување на пчелниот фонд во Долни Полог. На прво место се болестите, следува труењето со пестициди што неконтролирано се врши при заштита на овошките. Но, највпечатливо е влијанието на предавателите за електронските медиуми, мобилната телефонија и кабелските телевизии.

„Пчелите имаат моќ да се оддалечат 5-7 километри од пчелното семејство и успешно да се вратат во своите кошнички и сандаци. Но, кога ќе се најдат во близина на предавателите или електричните далноводи, пчелите го губат вродениот инстинкт и не знаат да се вратат во своето семејство. Така, или се губат или умираат“, објаснува Мирче Настоски, претседател на Пчеларскиот сојуз на Македонија, инаку пасиониран пчелар. Решение на овој проблем за пчеларите е да ги поставуваат пчеларниците подалеку од предавателите и далноводите.

Настоски вели дека пчеларството веќе станува значаен извор за егзистенција и не е само хоби на пчеларите. Во нашата земја од пчеларство егзистираат 4.000-5.000 семејства. Тие имаат околу 75.000 пчелни семејства. Во различни периоди бројот на пчелните семејства надминувал и 120.000, но од повеќе причини годинава дошло до намалување.

Јонуз Махмути е претседател на Пчеларскиот сојуз на Тетово. Според негова евиденција, речиси 10 отсто од пчелните семејства во Македонија се од Тетовскиот регион, каде што има извонредни услови за пчеларство. Махмути смета дека над 180 пчелари професионално се занимаваат со оваа дејност.

Пчеларите имаат свои видувања за влијанијата на болестите и пестицидите во уништувањето на пчелниот фонд. Тие велат дека во зима, како најризичен период, недоволно упатените или ��лчни пчелари ги оставаат пчелните семејства без доволно зимски залихи. Во вакви услови не се придржуваат и кон потребата од нектарско прихранување или шеќерен сируп. Сето тоа условува појава на разни болести кои пчеларите не се во состојба да ги надраснат. Во тој период пчелите ги напаѓаат и надворешни болести.

Пчеларите укажуваат и на недоволната соработка со овоштарите за време на цутењето на овошките. Голем број овоштари токму во тој период ги третираат овошките со пестициди, кои се вистински отров за пчелите. Настоски и Махмути сметаат дека заштитата на овошките може да се обезбеди или пред цветање или потоа. Но, ако веќе се одлучат за прскање за време на цветањето, сугерираат на информирање на пчеларите за да ги затворат пчелите во најкритичните денови. Како последица на оваа негрижа и некоординација, забележани се масовни труења на цели пчелни семејства.