Само еден гол на Ангеловски против Загреб

Левиот бек на романскиот првак Констанца и на македонската репрезентација Бранислав Ангеловски постигна еден гол во натпреварот со Кроација осигурање Загреб на домашен терен во првото коло од групата Д на Лигата на шампионите. Романците беа декласирани со 33:23 од Хрватите, во чии редови „експлодира“ левото крило Љубо Вукиќ, кој со своите 13 погодоци води на листата на стрелците.

Со девет гола втор е Алексеј Шиндин од дебитантот Санкт Петербург, кој прексиноќа дома ја совлада Босна со 32:27, а кај сараевчаните најефикасен беше Ристо Арнаудовски со седум прецизни удари во рамките на рускиот гол.

Најдобриот македонски ракометар и од неодамна член на Сиудад Реал, Кирил Лазаров, со осумте погодоци во домашната победа над Флензбург од 27:19 моментно е трет стрелец во елитното клупско натпреварување. (Р.Д.)