Младинците во тешка група за СП

Исланд, Србија и Естонија ќе и' бидат противници на ракометната репрезентација на Македонија составена од играчи до 21 година во првата група од квалификациите за Светското првенство 2011 во Грција. Според вчерашната ждрепка во Копенхаген, извршена на маргините од 10. Конгрес на Европската ракометна федерација, Македонија го доби правото да биде домаќин на групата, а натпреварите ќе се одиграат од 7 до 9 јануари. Само првопласираната селекција ќе избори настап на мундијалот закажан за 17-31 јули.

Во европскиот дел од квалификациите учествуваат 31 национален тим, поделени во осум групи. Осумте победници ќе им се придружат на Данска, на Португалија и на домаќинот Грција како директни учесници на шампионатот.

Утре своите ривали во квалификациите за ЕП 2011 во Чешка ќе ги дознаат и македонските репрезентативки до 17 години, кои се наоѓаат во вториот од трите шешири. Терминот за квалификациските турнири е од 25 до 27 март, а ЕП ќе се одржи од 23 јуни до 3 јули. (Р.Д.)