Можни ли се избори во февруари?

Извршниот комитет на ВМРО-ДПМНЕ синоќа требаше да донесе одлука дали и кога би се одржале предвремени избори

Светлана Унковска


Доцна синоќа на маса пред членовите на Извршниот комитет на ВМРО-ДПМНЕ требаше да биде ставена иницијативата за предвремени избори, на која инсистираат опозициските партии. Каква одлука се очекува и какво е расположението во партијата, вчера пред состанокот никој не сакаше да брифира.

Извори од владејачката партија велат дека доколку се прифати да се оди на изборен мегдан, како можен датум се разгледува тоа да биде септември идната година. Дотогаш во ВМРО-ДПМНЕ очекуваат дека би можело да се почувствуваат одредени придобивки од парите што ќе се земат од ММФ. Истовремено, како опција се спомнува и февруари, пред да се одржи пописот, но за да се запазат роковите, би требало веднаш да се распушти парламентот.

Поранешниот претседател на Собранието, Стојан Андов, смета дека ако се донесе одлука за нови избори, можно е тие да се одржат во февруари, но за него, честите избори се знак на нестабилна политичка ситуација.

„Објективно, честите избори се знак на нестабилност на политичката ситуација, неможност да се одржи власта и недоследност на програмите на политичките структури, па затоа се оди на проверка кај гласачите“, истакна Андов. Доколку се оди на избори, појаснува Андов, треба најпрво да се донесе одлука за распуштање на парламентот и во рок од 45 дена претседателот на Собранието треба да го утврди рокот за одржување на изборите.

Околу темата за или против распишување предвремени избори, премиерот и лидер на владејачката ВМРО-ДПМНЕ, Никола Груевски, претходно одржа консултации и со претседателите на помалите партии од коалицискиот блок „За подобра Македонија“. Партиски извори тврдат дека Груевски во понеделникот за ова разговарал и со владиниот партнер Али Ахмети.

На состанокот со помалите коалиционери биле изнесени поделени мислења за тоа дали да се одговори на барањата на опозициската СДСМ, меѓутоа, преовладувал ставот дека предвремени избори не се потребни. Повеќето од нив се изјасниле дека не гледаат аргументи за распуштање на парламентот само затоа што тоа го бара опозицијата. Истовремено било посочено и дека тоа не било во интерес ниту на граѓаните, ниту на државата, бидејќи земјава не е загрозена од безбедносен, политички, економски или друг аспект и дека во моментов треба да се фокусираме на евроатлантските интегративни процеси.

Претседателот на Демократската партија на Турците, Кенан Хасипи, вели дека на средбата секој поединечно ги анализирал состојбите, за или против избори, но дека не бил заземен генерален став ниту пак се лицитирало со можни датуми за предвремени избори.

„Сите коментираа на свој начин и ги изнесуваа своите гледишта, но ништо конкретно не беше утврдено. Разговараме и сите поединечно ги изнесоа своите ставови. За мене и двете варијанти се прифатливи и според нас ирелевантно е дали ќе има предвремени избори или не“, вели Хасипи.

Ставот на владиниот партнер ДУИ уште во понеделникот го изнесе портпаролот на партијата Ермира Мехмети, која рече дека предвремени избори може да се распишат откако ќе се реши спорот со името.

Вчера и Централниот совет на Нова демократија расправаше за предвремени избори, на која едногласно е потврдена партиската одлука за одржување предвремени избори.

И додека партиите лицитираат за и против избори, Институтот за политички истражувања вчера ги објави резултатите од испитувањата на довербата на партиите кај граѓаните, спроведена од 3 до 5 декември на 1.100 анкетирани. Се покажува дека и натаму е висок процентот на гласачите кои се изјасниле дека нема да гласаат и тоа 28 проценти, а дополнителни 25 отсто се изјасниле дека се неопределени. И натаму највисок рејтинг има владејачката ВМРО-ДПМНЕ, која со 23,1 отсто води пред опозициската СДСМ за која се изјасниле 11,3 проценти. Од албанскиот блок партии за ДУИ се определиле 6,3 отсто, за ДПА 2,2 и за Нова Демократија 1,1 проценти.

Кога станува збор за довербата во политичарите, 38,6 отсто се изјасниле дека не му веруваат никому, за премиерот Никола Груевски се изјасниле 23,9 а лидерот на опозициската СДСМ Бранко Црвенковски има доверба кај 8,6 отсто од испитаниците. Али Ахмети има 6,3 отсто доверба, Мендух Тачи 2,3 насто и Имер Селмани со 1,5 проценти.