Пак не се лета поради вулканот во Исланд

ДАБЛИН - Сите летови кон Северна Ирска и Ирската Република и обратно требаше да бидат обновени вчера во 13 часот, по приземјувањето поради нови ризици од вулканска пепел.

Воздушниот простор над Аутер Хебрајд во Шкотска е затворен, односно аеродромите „Тири“, „Бара“ и „Бенбекула“, како и „Кемпелтаун“ во Аргајл. Линиите кон Северна Ирска и Ирската Република и обратно беа откажани во 7 часот според локално време.

Пепелта се движи од истиот вулкан на Исланд што го прекина воздушниот сообраќај во април. Минатиот месец летовите над Европа беа забранети шест дена поради стравувања од влијанието на вулканската пепел врз моторите на авионите.

Во останатиот дел од Обединетото Кралство, сообраќајот се одвива според вообичаениот распоред. Одлуката да се повлечат ограничувањата следуваше по безбедносните тестирања што покажаа дека моторите би можеле да се движат во области со пепел со мала густина.

Најновиот прекин на сообраќајот беше прогласен додека министрите за транспорт на ЕУ се на состанок во Брисел за да ги разгледаат начините за подобро управување на воздушниот сообраќај со оглед на настаните од минатиот месец. (Би-Би-Си)