Понуда што не може да се одбие

Присуството на официјална делегација на Молдавија на церемонијата за одбележување на поразот на нацистичка Германија, што ќе се одржи на 9 мај во Москва, ги налути и јавноста и членовите на владејачката коалиција во земјата, Алијанса за европска интеграција (АИЕ). Посебно датумот побудува сеќавања за вклучувањето на Молдавија во СССР и, исто така, нерешеното прашање за проруската сецесионистичка територија Приднестровие, кон која републиката, каде што се зборува романски јазик, има претензии. „Журнал де Кишинев“ јавува дека опонентите за учество на Молдавија на настанот, кои веќе организираа масовен протест, при што неколку илјади демонстранти излегоа на улиците на Кишинев на крајот на април, нема да бидат премногу задоволни од информациите дека под притисок од неговите партиски колеги, актуелниот претседател Михај Гимпу ја надмина првичната воздржаност и ја прифати руската покана. Сепак, Гимпу, кој неодамна потпиша договор за стратегиско партнерство со Романија, нема да учествува на состанокот на лидерите на Комонвелтот на независни држави, закажан за 8 мај. Според дневниот весник, ова прашање ги нагласи „невидливиот конфликт“ меѓу Русија и Запад и „стратегиската улога“ на Молдавија „во воспоставувањето нови сфери на влијание во поранешната територија на Советскиот Сојуз“. (Журнал де Кишинау)