Нема веќе да има ќебиња врз тезгите на пазарите

„Скопски пазар“ презеде конкретни активности за отстранување на практиката по завршување на пазарниот ден пазарџиите да ги покриваат тезгите со овошје и зеленчук со ќебиња, черги, јамболлии и најлони. Сега на пазарите „Буњаковец“ и „Зелен пазар“ по завршување на работното време, корисниците ја повлекуваат стоката од тезгите при што остануваат празни продажни места. Тоа, како што информираат од „Скопски пазар“, овозможува полесно и потемелно чистење на тезгите, како и подобрување на хигиената кога станува збор за продажба на ваков вид производи.

Овие активности на претпријатието следуваат по пишувањето на „Утрински весник“ дека пазарџиите на крајот од денот ги оставаат овошјето и зеленчукот на тезгите, кои ги покриваат со разни партали, поради што производите се контаминираат и се полнат со бактерии. Тогаш сите се оградија од обврската за тоа кој треба да го контролира ова и да го санкционира, а се случува со години. За ненадлежни се прогласија и Државниот пазарен инспекторат и Дирекцијата за храна од каде што вината ја префрлија на организаторот на пазарите. Во конкретниот случај „Скопски пазар“ сега ја презеде работата во свои раце ветувајќи дека акцијата ќе продолжи да се реализира и на другите пазари. Додаваат дека покрај одржувањето на хигиената на тезгите, на „Зелен пазар“ се поставени и 20 нови тезги. (Сн.К.)