„Лисици“ на зонските паркинзи

Јавното претпријатие „Градски паркинг“ ќе поставува блокатори за тркала на зонското паркирање во Дебар Маало и во Аеродром. Секој што „заборавил“ да плати за паркирање или, пак, го пречекорил дозволеното време, ќе добие „лисици“ на тркалото на паркиралиштата на улиците „Орце Николов“, „Ѓуро Ѓаковиќ“ и на „Ленинова“ во Дебар Маало и кај „Бисер“ и „Веро“ во Аеродром. На возилата со „лисици“ ќе им се стави и налепница со информации каде да се обрати сопственикот за деблокирање. Ако не го направи тоа во рок од еден час, возилото ќе биде кренато од „пајак“. (С.Н.)