Мартинез го дели оптимизмот на Моратинос

Од нашиот дописник
Тони Гламчевски

Стразбур - Потпретседателот на Европскиот парламент, Мигел Анхел Мартинез, ги дели увереноста и оптимизмот на шефот на шпанската дипломатија, Мигел Анхел Моратинос, за почеток на преговори на Македонија со ЕУ и оценува дека тоа се темели врз добрите информации и реализмот.

- Се' што вели Моратинос е реалност. Ние двајцата сме големи оптимисти што се потпираат врз реализмот и добрата информација. Јас сум повеќе од оптимист, ангажиран сум и го имам оптимизмот на некој што мисли дека има право и длабоко е подготвен да се бори за да се наметне разумот. Тоа е оптимизмот на правдата и на разумноста, вели Мартинез. Сепак, смета дека не треба да се брза, туку да се оди полека за да не се направат грешки.

- Не важно дали тоа ќе се случи за време на шпанското претседателство. Во историјата на Шпанија имаше еден крал, кој на својот слуга му велеше: „Облечи ме полека, бидејќи брзам. Тоа е мисла што ја имам на ум. Мене, исто така, ми се брза да видам како Македонија и' се приклучува на ЕУ, но потребно е да се оди полека за да не се направат грешки. Проблемот не се решава за еден месец или за два. Ако се случи тоа за време на шпанското претседателство, тогаш тоа е уште подобро, јас ќе бидам задоволен. Но, ако се случи три месеци подоцна, тоа е, исто така, добро. Според мене, важно е да се деблокира процесот и да започнат преговорите колку што е можно побрзо, истакнува Мартинез.

Овој искусен шпански европратеник претседаваше со Парламентарното собрание на Советот на Европа, во моментот кога тоа донесе одлука за приемот на Република Македонија, под привремената референца. И тогаш како и сега спорот за името беше една од пречките за членство.

На прашањето зошто во изминативе години Европа не знаеше да го реши овој проблем, Мартинез нагласува: „Ова не е лесна работа, тоа е проблем што треба да се реши меѓу Македонците и некои нивни соседи. Ова прашање често ми предизвикуваше негодување и длабоко ме надразнуваше, бидејќи не можам да го сфатам добро проблемот. Во животот сум се нашол пред сложени работи, но ова, според мене, е едноставна ситуација што вештачки се усложнува. Се надевам и сигурен сум дека разумноста ќе надвладее. Не можам да сфатам дека се забавува проц��сот од кој, од една страна, зависи напредокот на народот на оваа земја и, од друга страна, исполнувањето на европскиот проект во целина“, завршува потпретседателот на Европскиот парламент, Мигел Анхел Мартинез.