Кој се настрви на фотелјата на битолските пензионери

БИТОЛА - Замеша ли политиката прсти и во битолското Здружение на пензионери, чија сметка тежи повеќе милиони евра. Поголем број пензионери, членови на Здружението, бараат поништување на целата постапка за избор на ново раководство, под сомнение дека нивниот долгогодишен претседател Гавро Пановски сака да присвои уште еден мандат. Пановски е категоричен дека партијата на власт се настрвила на парите на пензионерите. Но, за него е спорно зошто досега никој од пензионерите не се пријавил како негов противкандидат.

Изборите за раководните тела на Здружението и за нов претседател се актуализираа во почетокот на месецов. Во соопштението потпишано од триесетина пензионери се вели дека во одредени месни заедници воопшто не биле одржани состаноци, а биле избрани нови раководства и делегати за Изборното собрание. Записниците биле правени формално, а списоците биле пополнувани со домашни посети на пензионерите, приврзаници на Гавро Пановски. Овие постапки се косат со Статутот на Здружението, велат засегнатите.

„Гавро Пановски, дефинитивно, да замине од тоа место. Луѓето велат дека не е тој претседател на Здружението, туку паша и дека владее со пашалакот. Ќе избере неколкумина од Здружението и ја тера работата, без да го почитува Статутот и законот“, предупредува Кочо Созовски, член на Здружението. Тој обвинува дека Пановски нетранспарентно ги троши парите на пензионерите, особено од членарината, оние 20 денари што им се задржуваат месечно на пензионерите.

„На времето се сеќавам се даваа свински полутки, сирење во канти или пити кашкавал на пензионерите, но сега го нема тоа. Каде одат парите од нашата членарина и за што се трошат“, прашува Созовски.

За актуелниот претседател Пановски кој на оваа функција има стаж од две децении обвинувањата имаат исклучиво политичка позадина. Пановски вели дека се чувствува доволно здрав за да истера уште еден мандат бидејќи функцијата не барала од него ниту да ора, ниту да копа. „Во овие избори е постапено по статут и закон. Меѓутоа ова е масло на ВМРО-ДПМНЕ. Оваа партија сака да постапи онака како што ги зеде парите од солидарниот фонд. Пресметајте колку пари зедоа од 270.000 пензионери со 140 денари месечно. Не сме гибнале во тој фонд ни де��ар, не сме имале потреба. Ама јас сум виновен што кажувам дека имаме толку многу пари во здружението“, возвраќа Пановски. Според него, секој денар од пензионерите е наменски потрошен или домаќински заштеден во македонските банки. (А.Б.)