Анонимус член на Судскиот совет

Опозицискиот СДСМ ја напушти седницата во знак на протест

Гордана Дувњак

Бранко Ушковски, човек со четири реда биографија и без еден ден искуство во судовите, како што го нарече опозицијата, е новиот член на Судскиот совет. Од 94 присутни пратеници, за него позитивно се изјаснија 69, двајца беа против, а во знак на протест пратеничката група на СДСМ ја напушти седницата. Неговиот избор беше верификуван завчеравечер по 18 часот, кога непосредно пред завршувањето на седницата, спикерот на парламентот, Трајко Вељановски, побара да се гласа по оваа точка, која беше оставена од претходната седница.

Интересно е што против изборот на Ушковски, покрај пратеничката на ЛДП Роза Каревска-Топузова, прв пат гласаше и еден парламентарец од редовите на власта. Од увидот во листингот, може јасно да се види дека партиската директива не ја послушала пратеничката на ВМРО-ДПМНЕ Благородна Дулиќ, поранешен член на Судскиот совет и врховен судија во пензија. Од чинот на гласање се воздржале и либералдемократите Андреј Жерновски и Ристо Пенов, Ѓорѓи Оровчанец од Нова алтернатива и Флора Кадриу од Нова демократија.

Веројатно некои од аргументите на опозицијата, сепак, допреле до пратеничката Дулиќ, која и самата знае што значи да се одлучува околу изборот, унапредувањето и разрешувањето на судиите, кои во државава ги има над 650.

Социјалдемократите, пред напуштањето на седницата, го повторија ставот искажан за време на парламентарната сесија, но и во матичната Комисија за избори и именување. За нив педесет и седумгодишниот правник од Центарот за управување со кризи е лошо кадровско решение, со кое се крши Уставот и се навредуваат сите судии во Македонија. СДСМ забележа дека тој од сите 12 пријавени на конкурсот, единствено не ги исполнува условите, бидејќи ниту е истакнат правник ниту, пак, има еден ден работно искуство во судството. Или, како што рече координаторката на оваа пратеничка група, Цветанка Иванова, „на душа ќе го имате овој несреќник“, бидејќи нема да знае како да се справи со работата во Судскиот совет. За него беше речено дека е партиски војник на ВМРО-ДПМНЕ, кој на ваков начин добива награда.

Новиот член на Судскиот совет е тотален анонимус за целата правосудна фела, па дури �� за многу негови колеги од Министерството за одбрана, каде што тој работел до 2005 година. Во МО извршувал функцијата шеф на архива и деловодство.

Она што за власта го прави „искусен правник“ е учеството како коавтор во пишувањето на обемниот Прирачник за полагање на правосудниот испит, кој не претставува ништо друго, освен збир на закони потребни за полагање на стручниот испит. Неофицијално се зборува дека е истакнат член на ВМРО-ДПМНЕ од Општинската организација во Чаир.

Ушковски доаѓа на местото на Љубе Богевски, кој исполни услови за пензионирање.