Стил
Купете звучници за 72.000 евра
Звучниците „наутилус“ се меѓу најценетите во светот, звукот што излегува од нив е перфектен.
Криза доаѓа, но тоа не значи дека не се нудат скапи работи. Во најдобрата продавница за хај-фај опрема во Македонија „Болин“, во Градскиот трговски центар во Скопје, можете да ги погледате, послушате, а ако имате пари и да ги купите легендарните звучници „наутилус“ на произведувачот BиW. Но, ќе ви требаат многу пари, дури 72.000 евра. И плус да имате просторија од најмалку 60 квадратни метри каде што ќе ја поставите целата опрема.
Звучниците „наутилус“ се меѓу најценетите во светот, звукот што излегува од нив е перфектен. Речиси никогаш да не посакате да ја исклучите музиката. Изгледот е футуристички, личат на морско коњче.
За да се постигне најдобар звук, за целата мрежа околу „наутилус“ се потребни предзасилувач и засилувач и осум моноблокни или четири стерео засилувачи за драјверите за еден пар звучници. Во „Болин“ така се вмрежени звучниците. Засилувачите преку кои оди звукот се „Мекинтош“. Тие чинат 47.000 евра. Значи, за целата опрема ви требаат околу 120.000 евра.
Премногу? Како за кого. Во продавницата велат дека има повеќе интересенти за оваа опрема. Еден познат скопски бизнисмен речиси и договорил нарачка на целосна ваква опрема. Се разбира, звучниците „наутилус“ во „Болин“ се експонати кои патуваат низ светот, во Скопје ќе останат уште две недели. Нарачката се прави одделно. Поминете во „Болин“, послушајте и уживајте во нестварниот звук. (Д.Р.)
|
