Ротации на судии во скопскиот Кривичен суд

Најмногу промени има во Истражното одделение каде што за нов раководител е избран Велче Панчевски

Љубиша Станковиќ

Разрешувања, смени и ротации се случуваат во скопскиот Кривичен суд по смената на раководната позиција на чие кормило неодамна беше поставена судијката Лидија Неделкова. На завчерашниот колегиум што го одржа новоизбраната претседателка на Основниот суд Скопје 1 - Скопје, како што дознаваме, присуствувале речиси сите судии, а средбата минала без некои поголеми потреси и турбуленции.

На средбата што ја имаа судиите во средата попладне, на само што е избран нов раководител на Кривичното истражно одделение, туку е избран и нов портпарол, но токму поради нетранспарентноста на судот, информациите до кои вчера можеше да се дојде се неофицијални.

Според наши сознанија, нов шеф на целото Истражно одделение е долгогодишниот истражен судија Велче Панчевски. За имено на Панчевски се врзува и местото портпарол на скопска „единица“, но дали тој навистина е именуван и за гласноговорник на судот или не, вчера немаше кој да потврди. Судијата Велче Панчевски доаѓа на местото на досегашниот раководител на Истражното одделение и портпарол на судот, Седат Реџепагиќ, кој, пак останува да работи истражни постапки. Токму на Реџепагиќ вчера му припадна таа должност да ја води истрагата за полицајците кои беа спроведени од граничниот премин Ќафасан.

Со одлука на претседателката Неделкова, од местото истражни судии во Одделот за организиран криминал се разрешени судијките Весна Басотова и Славица Андреева. Тие во наредниот период ќе работат т.н. обични кривични предмети. Во Одделот за организиран криминал своето место, освен Реџепагиќ, го зачува и судијката Катица Јовановска, а на едно од испразнетите места ќе седне истражниот судија Владимир Туфегџиќ.

Само малку пред донесувањето на овие одлуки, Неделкова на работа во Одделението за прекршоци ги упати судијките Кадрие Селмани и Љубинка Георгиевска, наводно, по нивно барање, а младите судии Зоран Димитриевски, Ѓоко Ристов истражниот Влатко Панчевски беа поставени за судечки судии во Одделот за организиран криминал.

На колегиумот одржан завчера неприсуствувала поранешната претседателка на Кривичниот суд, Добрила Кацарска. Кои се причините поради кои Кацарска не дошла на работниот состанок засега е непознато.

Добрила Кацарска и судиите Ристо Катавеновски и Ирина Петрова беа на листата за претседател на Основен суд Скопје 1 , но токму Неделкова беше таа која ја доби довербата на 14 од 15 гласови потребни за избор. На изборот на 7 јули таа се избори и за т.н. Бадентерово мнозинство.

И покрај тоа што измените што се случија повеќе изгледаат како шминка, сепак, не треба да се исклучи можноста дека поместувања ќе има и во наредниот период. Нашите сознанија велат дека направените измени ќе важат до крајот на оваа календарска година, односно дека Неделкова ќе ја опсервира работата на своите колеги во наредните три месеци, а потоа ќе прави нови резови.