Концерт на триото „Стејси фокс“
Вечерва на „Скопско лето“, како дел од циклусот кафе-кино, во Забавниот парк „Луна“ во 21 часот, ќе се прикаже филмот „Ѕвездена прашина“ од 2007 година, во режија на Метју Вон. Во филмот кој беше прогласен за СФ филм на годината според британскиот магазин „Емпајер“, улогите ги толкуваат: Роберт де Ниро, Мишел Фајфер, Клер Дејнс, Сиена Милер... „Младиот Тристан сака да го освои студеното срце на својата љубена и тргнува во потрага по падната ѕвезда. Патувањето води низ мистерии и забранети земји...“
Во Сули ан пак, вечерва во 21,30 часот, ќе се одржи концерт на женската американска група „Stacey Fox“, наречена по нејзината лидерка, композиторка и перкусионистка. Заедно со Стејси Фокс, во триото членуваат и Марија Антони, вокал, ситар и флејта и Меган Хрт, вокал, електрична и акустилна виолина. Нивниот концертен репертоар се состои од звуците на разновидните удиралки, индијанското пеење и мелодии. Концертот е поддржан од Амбасадата на САД во македонија. (Т.И.) |
