„Паника, мажи на работ на нервен слом“ од Русија на „Охридско лето“
Вечерва на фестивалот „Охридско лето“, во летната бавча на Центарот за култура „Григор Прличев“ во 21 часот, ќе се изведе претставата „Паника, мажи на работ на нервен слом“, на „Бели театар“ при Достоевски музејот од Санкт Петербург, Русија. Режисер на претставата е Александар Бергман. Улогите ги толкуваат: Александар Бергман, Витали Коваленко и Александар Новиков, кои заедно со Тино Светозарев и Вера Бирон се и автори на претставата. Сценографијата е на македонскиот уметник Тино Светозарев кој во изминативе неколку години работи и живее во Русија.
Оваа драма на финскиот сценски директор и драмски писател Мика Милуахо, претставува иронично прикажување на теми од филмовите на шпанскиот контроверзен режисер Педро Алмодовар. Станува збор за три ликови, мажи на возраст од околу 40 години, собрани во еден стан. Обидувајќи се да се справат еден со друг, тие меѓусебно си ги откриваат своите сопствени проблеми... Оваа претстава доживеа успех на нејзината поставка во Хелсинки во 2006 година. (Т.И.) |
