За странските бизнис-партнери податоци од нашиот Централен регистар
Македонските компании што имаат странски бизнис-партнери ќе можат да ги дознаат податоците за своето работење, преку домашниот Централен регистар. Сепак, тоа ќе почне да се применува од 2012 година.
Концептот на проектот, во кој се вклучени Македонија, Германија, Ирска, Велика Британија, Србија, Португалија и Австрија, треба да овозможи размена на релевантни податоци меѓу националните регистри за сите бизнис- субјекти, односно да им помогне на бизнис-корисниците преку своите национални регистри да добијат информации за одредена компанија од друга земја за која се заинтересирани.
Инаку, вчера беше соопштено дека Македонија преку Централниот регистар го презема претседателството со Европскиот форум на бизнис-регистри од Германија и во јуни идната година ќе биде домаќин на 15. конференција на оваа Асоцијација. Значењето на конференцијата е дотолку поголемо што на него ќе се разговара токму за поврзувањето на националните регистри, што како пилот-проект е започнат во 2010 година, а треба да заврши во 2012 година. „Се надеваме дека за времето на нашето претседавање ќе има значително напредок во креирањето на оваа платформа што е под директива на Европската комисија“, изјави Ванчо Костадиновски, директорот на Централниот регистар. Тој информира дека се работи на платформата веќе една година и оти Македонија ги има испратено потребните податоци. Европскиот форум на бизнис-регистри е формиран со цел да се подобрат бизнис-услугите за трговијата и за индустријата. Во него членуваат 31 држава, меѓу кои и Македонија, а секогаш на конференциите учествуваат и претставници од меѓународната асоцијација на комерцијални администратори, Светска банка и Европската комисија. (С.Н.) |
