Насловна

Светлата на возилата трошат пет милиони евра

Зголемената потрошувачка на гориво поради користењето вклучени светла на возилата преку ден, ги чини македонските граѓани пет милиони евра годишно. Пресметките на експертите презентирани во Стопанската комора на Македонија покажуваат дека возачите годишно треба да одвојуваат вкупно 600.000 евра само за светилки, а доколку постојано се во движење, би потрошиле околу 210.000 светилки.

Освен негативниот економски аспект, обврската за возење со вклучени светла лошо се одразува и врз животната средина, преку зголемено емитирање отровни гасови. Страдаат акумулаторите и другата електрична опрема. Притоа, ефектот во сообраќајот е речиси минимален, нема евидентно намалување на несреќите.

Од овие причини, многу учесници во сообраќајот, таксисти, граѓани, правни субјекти, возачи на градските сообраќајни возила, бараат да се преиспита законската обврска и евентуално да се скрати периодот на користење дневни светла по примерот на западните земји.

„Се прашувам зошто овој закон не се применува во државите што се многу посеверно од нас, како Холандија и Германија. Австрија почна да го применува, па го укина, во Бугарија и во Хрватска се вози дење со запалени светла само во зимскиот период“, рече Љупчо Гаштеовски од Геотермален систем - Кочани.

Од 2007 до 2010 година, откако во земјава е во сила законската обврска за возење со вклучени светла преку ден, безбедноста во сообраќајот е минимално подобрена и, генерално, не може да се каже дека е резултат од користење дневно осветлување.

„Во 2007 година имаше 173 загинати, во 2008 година 162, во 2009 година 160, а лани 162. Не можеме да потврдиме дека оваа блага амплитуда на намалување се должи на употребата на светла. За сообраќајните незгоди има многу фактори“, вели Кузман Дамчевски, виш полициски советник за сообраќајни работи при Бирото за јавна безбедност. (Ек.Р.)