Насловна

Не' виделе на Си-Ен-Ен, па дојдоа во „Бунарџик“

„Кемет електроникс“ ќе им биде нов сосед на „Џонсон контролс“, „Џонсон Мети“ и на „Текнохозе“ во „Бунарџик“

Маја Томиќ

Стартува четвртата инвестиција во зоната „Бунарџик“, после „Џонсон контролс“, „Џонсон Мети“, и „Текнохозе“, која се' уште не почнала со производство. Американската компанија „Кемет електроникс“ вчера свечено го одбележа почетокот на својата инвестиција, со фрлање лопата на фабриката што ќе се гради, а која ќе почне со производство во наредната година. Претставници на оваа компанија во Владата потпишаа два договора, за закуп на земјиште од 4,4 хектари за период од 50 години, согласно со Законот за слободни економски зони, и за државна помош. Ќе се произведува целокупна технологија за кондензатори и друга опрема за зелената индустрија. Вредноста на инвестиција е 25 милиони евра, а ќе се вработат 500 лица. На почеток ќе бидат вложени 12 милиони евра и ќе се ангажираат 200 вработени. „Ова е нашата прва фабрика во Европа и наша 11 инвестиција досега. Идејата за инвестирање токму овде ми дојде гледајќи го спотот на Си-Ен-Ен за Македонија. Им се јавив на моите помошници и ги започнавме контактите со македонските власти. За кратко време ја донесовме одлуката да дојдеме на овој пазар, при што големо влијание имаше и консултацијата со ’Џонсон Мети‘ и ’Џонсон контролс“, изјави Пер Лооф, извршен директор на корпорацијата „Кемет електроникс“. Педесет недели траеле контактите и преговорите меѓу Владата и претставници на оваа американска компанија. Како што посочи директорот на Дирекцијата за слободни економски зони, Виктор Мизо, првиот контакт со „Кемет електроникс“ се остварила на една меѓународна економска конференција. „Следеа уште многу состаноци додека на ’Кемет електроникс‘ не им се потврдија нашите гаранции за успех и за профит во работата овде, поради законските можности што им ги нудиме на странските инвеститори“, истакна Мизо.

Премиерот Никола Груевски најави дека уште најмалку пет компании ќе дошле да градат во „Бунарџик“ во наредните пет-шест месеци, такви информации му биле пласирани од Дирекцијата за странски инвестиции.

„Со ова инвестиција на ’Кемет електроникс‘, им одговоривме на сите скептици и дефетисти околу тоа дали ни беше потребно да се презентираме на странските телевизии или не. Сега се потврди дека тоа ни беше од полза. Новата инвестиција ќе ја раздвижи нашата економија која се' повеќе покажува знаци на закрепнување“, изјави Груевски.

Според вицепремиерот за економски прашања Владимир Пешевски, реформите и мерките кои Владата ги спроведуваше за привлекување на странски инвестиции почнуваат да даваат резултати. „Фактот што ’Кемет‘ одлучи да инвестира во Македонија е потврда дека поволностите што ги нудиме се конкурентни и во глобални рамки. Нивната одлука е резултат на неколку месечни разговори, преговори и презентации кои јас и Агенцијата за странски инвестиции директно ги водевме“, потенцираше Пешевски. Додаде дека моментно се одвиваат преговори со уште неколку потенцијални странски инвеститори. „Во разговори сме со уште неколку реномирани компании. Ќе продолжиме и натаму да ги презентираме фискалните и локациските поволности кај нас. Денешниот почеток на реализација на инвестицијата на ’Кемет‘ ќе ни послужи како одлична референца во овие разговори“, изјави Пешевски.

Инаку, компанијата „Кемет“ е со седиште во Јужна Каролина, САД, има 19 производствени објекти во 10 земји од светот. Таа е една од најголемите светски доставувачи на производи што се користат речиси во сите електронски уреди, вклучувајќи ги и специјализираните уреди за авионската и автомобилската индустрија, комуникациските системи, компјутерска и воена опрема. Во првите три месеци од годинава остварила продажба од над милијарда долари.