Во скопските средни училишта пристигнаа само 26 приговори
Во МОН се зачудени што не добиле ниту еден приговор од Македонски Брод
Жаклина Хаџи-Зафирова
Од вкупно 5.417 матуранти колку што полагаа матура во Скопје, во училиштата се поднесени само 26 приговори на завчерашниот прв ден од рокот предвиден за поднесување жалби во врска со двата екстерни испита од државната матура. Во Министерството за образование и наука се зачудиле кога добиле информации дека ниту еден приговор не е поднесен во Македонски Брод, а само еден е регистриран во Берово. Сепак, надлежните се' уште не ја комплетираа целосната слика од училиштата во земјава, бидејќи и во текот на вчерашниот ден ги прибираа податоците за поднесените приговори.
Од Бирото за развој на образованието велат дека се' уште немаат конкретни податоци за што се однесуваат точно приговорите. Конечните резултати од матурата со разгледаните приговори ќе бидат познати на 26 јули кога повторно ќе се истакнат во училиштата. Во меѓувреме, не стивнуваат реакциите за испитите од државната матура, а најголемите забелешки на родителите и на учениците се однесуваат на начинот како се оценувани матурантите.
Од 26-те приговори поднесени во скопските училишта, 20 се однесуваат на тестовите по македонски јазик, три се за тестот по англиски и три за тестот по математика - основно ниво.
„Приговорите се класифицираат. Се' уште не знаеме за содржината на приговорите, кои допрва ќе се разгледуваат. Како и тестовите, ќе се разгледуваат под шифра“, вели Катица Спасовска - Бинчева од Бирото за развој на образованието. Во оваа институција се надеваат дека ќе добијат мал број приговори, поаѓајќи од фактот што сумата за поднесување приговор е висока и изнесува 2.000 денари за испит.
„Сумата ја поставивме токму поради фактот што сакавме да спречиме наплив од приговори кои би ги блокирале државните институции. На овој начин приговор ќе поднесе само оној што е сигурен дека згрешил во тестот“, ни изјави директорката на Бирото за развој на образованието Весна Хорватовиќ.
И во текот на вчерашниот ден не престанаа да пристиг��ат поплаки во нашата редакција околу спроведувањето на матурата. Родителите се жалат на критериумите за оценување и високиот праг поени кои се потребни да се помине тестот.
„Како пример го наведувам пишувањето состав, односно есеј на одредена тема. Есејот не е прашање кое може објективно да се прегледа. Не верувам дека повеќе прегледувачи го читале есејот, па се согласувале за поените. Тоа е една слабост што постои и е многу дискутабилна, бидејќи се' зависи од прегледувачот, дали нему ќе му се допадне стилот, концепцијата, изборот на зборови...“, пишува еден родител во реакцијата испратена до нашата редакција. Родителот укажува и на тоа дека тестот по македонски јазик е оценуван со повисоки критериуми. „За да се добие петка по македонски јазик, како што разбравме, треба да се има процент повисок од 94. Мојот син положи македонски јазик со четворка и освоени 92 процента, што сметам дека е висок процент. Потребно е да се смени оценувачката скала, бидејќи вака изгледа како професорите по мајчин јазик да не ја вршеле добро својата работа“, објаснува загрижениот родител.
Дел од професорите кои реагираа на нашата Интернет-адреса велат дека децата заслужено ги добиле оценките, бидејќи не учат доволно. И децата признаваат дека дел од оценките им се подарени. „Доста се правиме луди. Половина од петките ни се подарени. Провлекувања со врски, молења, неодговорни професори кои повеќе ги интересира рецепт за торта одошто се' друго. Еве, се виде на што сме“.
Еден средношколец, кој се преселил во Америка, го споделува своето искуство. Тој вели дека средношколците во американските училишта добиваат по три оценки за еден предмет секој ден и секој ученик има увид во оценките за првата четвртина или половина од годината. „Нема врски и оценката е реална. Не само матурантите, туку и сите други имаат завршен испит, што значи децата се подготвени за ваквото оценување уште од првата година“, вели тој. |
