Претходен број

Змии сеат страв во околината на Тетово

Во тетовската болница за последниве два месеца се регистрирани десетина случаи од змиско каснување

Гојко Ефтоски

ТЕТОВО - Змии сеат страв во Тетовско. За последните два месеца во тетовската Клиничка болница се регистрирани десетина случаи од змиско каснување. Во четири интервенции лекувањето било болничко. Еден од пациентите како сериозен случај бил испратен во Клиничкиот центар во Скопје.

Во Хируршкото одделение во Тетово велат дека во овој период од годината се јавуваат повеќе пациенти каснати од змии, и возрасни лица, но и деца. Така, змија каснала дете во рака кога седело на клупа за одмор, а друго додека било во спортскиот центар. Жители на Тетово раскажуваат дека жена била касната од змија додека се капела во импровизиран базен во месноста Бањиче над Тетово.

Мирко К. од Теарце тврди дека за неколку дена во дворот на неговата куќа, која се наоѓа во горниот дел на селото, отепал дури шест смока. Во Џепчиште настрадал плочкар кој бил ангажиран на реновирање куќа. Нухи Вејсели, претседател на МЗ „Џепчиште“, вели дека работникот не бил мештанин и затоа не му го знае името. Настанот се случил додека работел на лепење плочки, кога неочекувано почувствувал силна болка на раката.

„Животот му беше загрозен. Човекот ненадејно се најде во тешка состојба. Благодарение на помошта што му ја укажаа соработниците, а потоа и брзата интервенција на здравствените работници, тој на крајот се извлече“, вели Вејсели.

Во Ветеринарната станица во Тетово потврдија дека летово зачестиле поплаките за појава на змии. Оттаму велат дека на повисоките предели почесто се забележувале змии- шарки, ѕвечарки, поскоци, додека во пониските места, во нивите и во дворовите се движеле смокови.

Сепак, најмногу зачудува што нема аналитичко согледување на проблемот со присутноста и опасностите од змии. Нема ниту точна евиденција на каснати лица. Покрај во тетовската болница, помош за вакви случаи укажувале и медицински екипи во голем број приватни здравствени организации во тетовскиот крај. Порано било практика ваквите случаи да се пријавуваат во Заводот за здравствена заштита, но тоа повеќе не се прави.

„Стап во рацете или каков било друг предмет и отворени очи, бидејќи не знаеш на што ќе наидеш“, беше советот на еден повозрасен тетовец, кој одеше кон Балтепе над Тетово.