Претходен број

Атина стравува од судир на грчки ултранационалисти со децата-бегалци?

Грчките весници прават сценарија и покрај демантите дека не се планира никаква посета на Лерин

Димитар Чулев

„Доколку активисти на организацијата „Златна зора“ се појават во селото Овчарани в недела на традиционалниот панаѓур во ова село, на кој концерт треба да одржи и македонскиот национален ансамбл „Танец“, тоа ќе биде сериозен сигнал дека грчката држава стои зад овие ултранационалисти“, изјави вчера за „Утрински весник“ висок претставник на Виножито, грчка политичка партија околу кое гравитира македонското малцинство во Грција. Од Виножито велат дека никаква манифестација не се планира по повод 60-годишнината од протерувањето на околу 25.000 деца по Граѓанската војна во Грција, манифестација која ќе се одржи во Скопје. Здружението на децата-бегалци од Егејска Македонија на завчерашната прес-конференција, исто така, ги негираше шпекулациите на грчкиот печат дека наводно во Лерин ќе отпатува поголема група некогашни деца-бегалци, а сега старци од над 70 години, што за грчката држава претставува провокација.

Но, грчкиот весник „Та неа“ вчера излезе со тврдење дека „тревога ја тресе Атина поради можности од судири меѓу крајно десните грчки националистички елементи и децата-бегалци, наследници на етничките Македонци од Грција“. Како што пренесе МИА, овој весник наведува дека владата во Атина располагала со информација за подготвени активности од страна на грчката крајна десна организација „Златна зора“, кои за време на викендот планирале да бидат во Лерин со цел да се конфронтираат со гостите од Македо��ија. Весникот цитира анонимен грчки претставник според кого за време на викендот ќе биле пречекани „околу 300 бегалци и нивните потомци кои ќе допатуваат во Лерин“. Владини извори, пишува „Та неа“, сметале дека ваквите инциденти може да имаат негативни последици врз Грција.

Ова затегнување на ситуацијата настапило по писмото испратено од премиерот Никола Груевски до неговиот грчки колега, Костас Караманлис, во кое побара признавање на македонското малцинство во Грција. Сите весници вчера ја пренесуваат изјавата на шефицата на грчката дипломатија, Дора Бакојани, која му забележала на премиерот Никола Груевски дека имал претензии за некакво непостојно малцинство, дека ги минира преговорите и оти тој што „сее ветрови, ќе жнее бури“.

„Елефтерос типос“ пишува дека Караманлис ќе му испрател одговор на Никола Груевски во врска со неговиот обид да се отвори непостојното македонско прашање во Грција.

Но, од Виножито потсетуваат дека кога е прашањето за „непостојното малцинство“ минатата недела, поточно на 10 јули, е одбележана десетгодишината на Одлуката на Европскиот суд за човекови права во случајот „Сидиропулос и другите против Грција“ во кој судот пресуди дека одбивањето на Грција да го регистрира Домот на македонската култура претставува кршење на членот 11 од Европската конвенција за човекови права. „Европската слободна алијанса – Виножито го осудува фактот дека една деценија по одлуката на Стразбур и речиси дваесет години по поведувањето на овој спор, грчките судови и натаму одбиваат да го регистрираат ова културно здружение“, стои на официјалниот сајт на Виножито. Во кусиот текст се потсетува дека во 1990 година група грчки граѓани решија да формираат непрофитна и невладина организација наречена Дом на македонска култура во местото Лерин и побара започнување постапка за регистрирање на здружението. Но, првостепениот суд во Лерин го одби барањето, тврдејќи дека целта на здружението е да се промовира идејата дека „постои македонско малцинство во Грција, што е спротивно на националните интереси, а со тоа и спротивно на законот“. Во 1998 година, по жалба на членовите на здружението, судот утврди дека Грција ја прекршила Европската конвенција. Обидот повторно во 2003 година да се регистрира овој дом беше отфрлен со истите причини и објаснувања. Сега ова прашање се наоѓа пред Врховниот суд на Грција, но доколку и тој одлучи како и пониските судови, правдата повторно ќе треба да се бара во Стразбур, велат од Виножито.


Лерин

На добронамерните предупредувања дека Македонија поради аспирациите за приклучување во ЕУ и НАТО, мора да направи компромис со Грција, од Виножито коментираат: „Прашањето за постоење етничко малцинство е покренато во Европскиот суд, а тој не и' припаѓа на ЕУ, туку на Советот на Европа, чиј член е и Македонија“.

Грчкиот печат не се занимава со Виножито, но затоа на големо информира дека Караманлис за писмото на Груевски ќе ги информира генералниот секретар на ОН, Бан Ки Мун, Европската унија и НАТО, кои ќе бидат запознаени со жестокото негодување на Грција поради отворање на прашањето за признавање на македонското малцинство и за враќање на имотите на протераните за време на грчката Граѓанска војна.

„Елефтерос типос“ коментира дека „сега кога ја има американската поддршка Груевски бара многу за да добие едно“, а весникот „Етнос“ барањето на македонската страна го третираат како директно мешање во внатрешните работи на Грција.

„Катимерини“ објави текст со наслов „Во очекување на нови провокации“ во кој наведува дека за време на средбата на децата-бегалци, што од 18 до 21 јули ќе се одржи во Скопје, може да се очекуваат нови повици за признавање на македонското малцинство. На средбата, според извори на весникот, се очекува да присуствуваат околу шест илјади македонски емигранти од Канада, САД и Австралија, а ќе биде испратено и соопштение до светските медиуми со кое ќе побара заштита на човековите права и слободи. Весникот го донесува и податокот дека 4.000 лица досега поднеле молби за враќање на одземените имоти во Грција.

„... Сите знаат дека барањата за македонско малцинство и македонски јазик во Грција се приказни од ’Илјада и една ноќ‘, но по 50 и повеќе години неприфатлива пропаганда, раководството на поранешната југословенска република сега е присилено да не прави чекори назад и да не отстапува“, пишува весникот „Елефтери ора“,кој како и повеќето од печатените медиуми констатира дека Груевски се потпира на Вашингтон и „грубо се меша во внатрешните работи на Грција“. „Катимерини“ смета дека писмото на македонскиот премиер го минира процесот на преговори и во текстот во кој цитира дипломати кои сметаат дека тоа што Груевски во писмото не ги спомнувал преговорите со Атина за спорот со името, требало да значи дека преговорите одвај и ќе продолжат. „Откако Груевски го постави прашањето за „македонското малцинство“ се поставува прашањето како тогаш ќе бара решение за спорот за името на Македонија“, пренесува МИА толкувања на извори од грчкото МНР.