Претходен број

Зошто се отвора случај и со „Макпетрол“?

Во Финансиската полиција се сомневаат во висината на досудената отштета

Гордана Дувњак

Дали Финансиската полиција прави преседан со отворањето на случајот со наплатената отштета за задржаните цистерни на „Макпетрол“, кога судскиот спор е одамна завршен, а компанијата успеа да си наплати од државната каса близу 6 милиони евра?

Или, пак, новите кривични пријави поднесени против седум лица се однесуваат на серија пропусти, кои не им биле познати на судиите, па погрешно ја утврдиле фактичката состојба, потпирајќи се на неточни податоци при утврдувањето на направената штета?

Станува збор за случај од времето на владеењето на премиерот Љупчо Георгиевски во 2001 година кога на чело на Царинската управа беше Драган Даравелски. Тој ги задржа цистерните на „Макпетрол“ на границата, обвинувајќи ги дека дериватите не се по потекло од Европската унија. Најголемиот нафтен дистрибутер во државата во редовна судска постапка, која траеше повеќе години, го доби спорот, а во ноември 2006 година ја наплати својата тужба.

Во Финансиската полиција се категорични дека не станува збор за преседан, туку за сторени злоупотреби на лица од „Макпетрол“, Царината, како и на вештото лице. За нив не е спорно дека компанијата претрпела штета во 2001 година, но не е толку голема како што е прикажана и наплатена.

„Ние не навлегуваме во судските одлуки, туку во сомневањата за сторени кривични дела од страна на инволвирани лица, кои му доставувале невистинити податоци на судот. А, во делот на Царината не презеле дејства да приговараат на ваквите процени, со што судиите биле доведени во заблуда со нецелосните и неточни податоци“, вели во изјавата за „Утрински весник“ директорот на Финансиската полиција, Љупчо Стаматовски. Тој потсетува на случаите „Бачило 1 и 2“, кои биле отворени по завршена судска постапка, откако се утврдило дека неправилно била утврдена отштетата.

Според Финансиската полиција, пропустите биле направени на неколку нивоа. Најпрво од вештото лице во однос на изготвеното вештачење, во кое на судот му биле дадени невистинити податоци во однос на лежарината, која од страна на „Македонски железници“ била отпишана, а „Макпетрол“ успеал да ја наплати.

Исто така, биле побарани пари за намалена продажба на мазут, иако според нивните направени контроли цистерните не биле сопрени. Како неточно се оценува и тврдењето на членовите на комисијата на „Макпетрол“ дека оваа фирма не можела во критичниот период да ја извршува својата основна дејност - продажба на бензини.

„Од направените проверки утврдивме дека во ниту еден момент ниту една бензиска пумпа или складишта не останале празни и без горива, туку се вршела дистрибуција и продажба. Во складовите на оваа компанија се чуваат и државните резерви“, нагласува Стаматовски.

Финансиската полиција ги товари осомничените три лица од Царината дека во законски предвидените рокови не презеле дејства со што му помогнале на „Макпетрол“ да ја добие судската битка. За нив е симптоматично и тоа што едно од тие лица подоцна е вработено на раководна функција во компанијата.

Од нафтената компанија пред два дена реагираа дека нема основа за кривичните пријави што ги поднела Финансиската полиција против пет лица вработени во „Макпетрол“. Тие се осомничени дека, наводно, го оштетиле буџетот за 2,2 милиона евра во спорот помеѓу компанијата и Царинската управа. Од Компанијата нагласуваат дека суштинското прашање кое се поставува е дали сега во кривична постапка може да се преоценува граѓанска парница за која се изјасниле сите судски инстанции.

Оттаму потсетуваат дека биле донесени вкупно осум пресуди, сите во корист на нафтената компанија. Царинската управа ги искористила сите редовни и вонредни правни лекови, процесот беше одложуван, но тоа не ја променила конечната одлука на судот.

„Утрински весник“ дознава дека досието „Макпетрол“ бил отворено на владина седница уште пред повеќе од една и пол година, кога со заклучок сите надлежни институции биле задолжени да го испитаат случајот во рамките на своите надлежности. По серија координации меѓу надлежните служби, водењето на случајот го презела Финансиската полиција.