Повредените војници на домашно лекување

Полицијата истражува зошто дошло до судирот меѓу автобусот во кој се превезувале војниците и „аудито“

Припадниците на АРМ кои завчеравечер беа повредени во сообраќајната несреќа што се случи на магистралниот пат Штип – Радовиш, по укажаната лекарска помош се пуштени на домашно лекување. Во дежурната хируршка амбуланта во Медицинскиот центар во Струмица биле донесени 27 лица. По извршените прегледи и рентгенолошки испитувања кај нив биле констатирани полесни телесни повреди. Само кај едно лице биле констатирани фрактури на ребрата и десната клучна коска. По извршените прегледи и укажаната лекарска помош сите биле пуштени дома.

Во несреќата се повредени уште пет лица, тројца од нив биле пренесени во Медицинскиот центар во Штип, а возачите на автобусот и патничкото возило биле пренесени во Клиничкиот центар во Скопје.

„Нема тешко повредени меѓу припадниците на АРМ и сите се пуштени на домашно лекување“, потврдува и портпаролката на Министерството за одбрана, Селвет Барути.

Сообраќајната несреќа се случи завчера околу 17 часот кај кривината за Неготино. Автобус на „Струмица експрес“, во кој се наоѓале војниците на АРМ на патот Штип - Радовиш се судрил со возило „ауди“, во кое имало тројца патници меѓу кои и едно мало дете.

Војниците се враќале од вежба на Криволак и оделе кон касарната во Штип. Во еден момент, од засега непознати причини, двете возила директно се судриле. Од ударот, со повреди се здобиле 28 војници, од вкупно 32, кои се превезувале во автобусот.

Во „аудито“ се повредени возачот, неговото дете кое има 11 години, и нивен роднина. Најтешки повреди има детето, кое е на лекување во Скопје. Автомобилот е однесен на вештачење, со цел да се утврдат причините за несреќата. Во тек е полициска истрага за целиот случај. (Х.Р.)