Во Гевгелија зголемен интересот за сопствен бизнис

Зголемен е бројот на пријави од невработени лица за формирање сопствени бизниси во Гевгелија, Богданци, Дојран и во Валандово, покажуваат бројките по последната програма што ја спроведе Центарот за вработување во Гевгелија, во согласност со владиниот Оперативен план за вработување во 2010 година.

Доставени се 16 пријави во кои доминираат услужни дејности, трговија на мало, консалтинг-услуги, Интернет-кафе, производство и пакување на производи од шеќер, како и земјоделска дејност.

Во изминатите три години од спроведувањето на програмите за самовработување во Гевгелиско-валандовскиот регион се поддржани 23 бизниси и се реализирани исто толку нови вработувања.

Поголема иницијативност покажале невработените од Валандовско, со реализирани 19 самостојни бизнис-програми, наспроти гевгеличани кои успеале да реализираат само четири самостојни вработувања, едно лани и три во 2007 година. (МИА)