Ванчо Муратовски денеска ја напушта фотелјата на ССМ

Синдикатот ја почнува правната процедура за докажување на нелегалниот избор на Живко Митревски за в.д. претседател

Маја Томиќ

„Денеска заминувам од кабинетот и ќе му го препуштам на Живко Митревски. Не сум силеџија и ова не е кралство, па некој да се тепа за престолот со мечови. И честитам на власта што успеа на нелегитимен начин да постави свој човек во ССМ. Синдикатот почнува процес за докажување на правдата и против незаконското избирање на новиот претседател, а воедно ќе поведе и постапка за кривична одговорност. Судот ќе каже кој бил во право, а овој обид на власта ќе и' трае кусо. Како што ќе влезе, така Митревски и ќе излезе од фотелјата. Бидете сигурни, јас ќе се вратам и идната година ќе го направам 18. конгрес на ССМ, така како што треба. На конгресот ќе биде избран друг за претседател, непартиски човек“, изјави Муратовски на вчерашната прес-конференција. Тој додаде дека ќе остане во ССМ, како претседател на Синдикатот за управа и правосудство, функција што ја извршуваше паралелно со претседателската.

Инаку, на завчерашната прес-конференција Живко Митревски рече дека одлуката на Советот на ССМ за негов избор за претседател, донесена минатиот вторник, е парафирана од страна на Министерството за труд и социјална политика и оти е извршена и регистрација во Централниот регистар. Самата експресна постапка, што вообичаено трае многу подолго, со која е заверена пишаната одлука од страна на државните институции, а на која немало печат од ССМ и не била верификувана ниту од статутарната комисија, според Муратовски, јасно кажува чиј човек е Митревски.

„Одлучно ќе им докажам на сите членови на ССМ дека Митревски добил поддршка од МТСП за нешто што е незаконско и спротивно на Статутот на ССМ. За тоа ќе бараме одговорност и од министерот Џељаљ Бајрами. Јасно е дека Митревски е поставен на функцијата со помош на политиката, со цел насилно да ја урне работата на ССМ и да го претвори во приврзок на власта“, изјави Муратовски.

Во саботата Митревски соопшти дека му е признаен легитимитетот.

„Врз основа на актот издаден од Министерството за труд и социјална политика е легитимирана севкупната постапка по службена должност и извршена е промената во Централниот регистар“, изјави Митревски, в.д. претседател на ССМ, отфрлувајќи каква било поврзаност со владејачката ВМРО-ДПМНЕ. Тој го повика Муратовски во демократска атмосфера и цивилизирано да му ја предаде должноста и најави сериозни и темелни промени во Синдикатот, оценувајќи ја економската состојба во земјата како сложена.

Во петокот, пак, од статутарната комисија на ССМ посочија дека Муратовски е легитимниот претседател избран на последниот 17. конгрес. До комисијата, како што рекоа, не е поднесено барање за смена на функцијата, а таа е единствено надлежна за спроведување на законитоста на постапката за избор и за разрешување на претседателот.

Митревски го тврди спротивното.

„На крај се исполни желбата на македонските работници и на над 80 отсто од членството на Синдикатот. Спроведени се одлуките на Советот и потврден е легитимитетот на постапката за отповикување на досегашниот претседател и за именување на новиот вршител на должност на ССМ“, рече тој. Напомна дека смената на Муратовски воопшто не е нечија болна амбиција, како што вели тој, туку мотив за тоа е потребата да се направи нешто конкретно во Синдикатот, преку заедничко, а не индивидуално дејствување. Синдикатот, како што рече Митревски, треба да се реформира по европски терк, да зајакне социјалниот дијалог и да се потпишат колективните договори.

Муратовски вчера посочи дека таа изјава на Митревски е необична, ако се има предвид дека токму единаесетте претседатели на грански синдикати, кои заедно со Митревски ја почнаа акцијата за неговата смена, во изминатите години ја блокирале целата активност во ССМ и давале отворен отпор во сите обиди да се направи нешто повеќе.