Дикс на мегдан на Болт

Освојувачот на два олимписки бронзени медала, Волтер Дикс ќе има можност двапати да трча против Јусеин Болт на Светското атлетско првенство во август, откако победи во трката на 200 м во американските квалификации во Јуџин. Победата со резултат 19,95 секунди остварен со помош на ветерот се надоврза на таа во спринтот за Дикс, кој ги освои бронзените медали на 100 м и на 200 м на Олимпијадата 2008, на која Јамајчанецот Болт ги урна светските рекорди во обете дисциплини.

„Навистина не можам да се видам себеси како губам“, изјави Дикс во врска со претстојниот мундијал во Даегу, Јужна Кореја. „Јусеин Болт, Асафа Пауел, кој и да е таму јас ќе ги ’застрелам‘. Убеден сум дека можам да го освојам златото по тоа што го сторив денеска“.

Освојувачот на титулата првак на САД на 100 м во петокот е прв со двоен триумф во спринтерските дисциплини по Тајсон Геј во 2007 година. Победите дојдоа по мал брзински тренинг, објаснува Дикс, ветувајќи дека ќе трча уште побрзо како што ќе одминува сезоната.

„Појавувањето тука и трчањето под 10 секунди на 100 м и под 20 секунди на 200 м навистина е благослов“, додаде тој.

Док Патон го освои второто место со за��станување од само три стотинки, а трет финишира Џереми Додсон, кој, исто така, патува за Даегу.