Според Вардар, МКФ функционира како приватна фирма на Димевски

Второлигашот тврди дека претседателот на Федерацијата и генералниот секретар, Лекиќ, се газди на МКФ спорт ДОО

Кошаркарскиот клуб Вардар веќе подолго време е незадоволен од работата на Кошаркарската федерација на Македонија. Челните луѓе на клубот сметаат дека Првата кошаркарска лига е нерегуларна, бидејќи 45 дена егзистира со нерегуларно избран Комесар, кој донесува одлука за одложување на натпревар два часа пред почеток на истиот. За Вардар е нерегуларен и почетокот на натпреварувачката 2010/2011.

„Откако го испративте Вардар 2000 во Втора лига, бидејќи не бил послушен кон вас, должни сте пред македонската јавност да објасните и како е можна замена на еден клуб од Прва лига, кој се откажал од натпреварување (К.К Вардар Осигурување) со третопласираната екипа од Втората лига. Посебно проблематично, крајно неодговорно и спротивно на статутот, е купувањето, односно продавањето на местото за Прва лига од страна на Плејмејкер на седмопласираната екипа од Втората лига Лирија, без правна основа да се натпреварува во елитното друштво. Во една трагикомична ситуација Лирија на шалтерот на вашата приватна фирма си купи место во Прва лига“, се вели во дописот на Вардар до претседателот на Федерацијата Даниел Димевски, на кого му забележуваат и за материјалното финансиско работење.

„Финансискиот извештај претставува елементарно кршење на законот. МКФ е основана на 17.7.2009, што значи дека финансиското работење од 22.11.2008 до 17.7.2009 претставува фалсификат. Покрај тоа финансискиот извештај завршува со загуба од 2.572.638 денари. Во истиот извештај потрошени се наменски средства доделени од Владата во износ од 1.575.000“, велат од Вардар и прашуваат: „МКФ не е регистрирана во Централниот регистар. Оттаму како е можно да има сопствена легитимна жиро сметка, како и штембил и печат?“.

Според Вардар, на 21.10. 2009 година е основано Друштво за маркетинг и спортски менаџмент МКФ СПОРТ ДОО, во сопственост на претседателот Даниел Димевски и генералниот секретар Дејан Лекиќ, во кое покрај спортски се наведени и следниве дејности: трговија со прехранбени продукти, консигнација, реекспорт, застапување и посредување во промет со стоки и услуги, малограничен промет со Бугарија, Грција, Албанија, меѓународна шпедиција. „Како е можно приватна фирма да работи во свое име, а за сметка на Македонската кошаркарска федерација“, потенцираат од Вардар.