Клиперси подобри од санси во дербито на Пацификот

Екипата на Лос Анџелес Клиперс го издржа налетот на Феникс и славеше со 108:103 во својот „Стејплс центар“. Во најголем дел од натпреварот клиперси имаа водство кое во еден момент достигна до 18 поени разлика, но Стив Неш и дружината одбиваа да се откажат, па до самиот крај вршеа притисок врз младиот домашен тим. Блејк Грифин го предводеше Лос Анџелес Клиперс до деветтиот сезонски триумф со 28 коша и 12 скока, Ерик Гордон додаде 24 поени, прв стрелец кај „сонцата“ беше Микаел Пиетрус со 25 коша.

Кошаркарите на Сан Антонио имаа релативно лесна пресметка со Вашингтон. Победија со 94:80 во што најмногу се истакна Тони Паркер. Францускиот интернационалец подели 14 асистенции и впиша 20 поени, еден повеќе од него постигна Емануел Џинобили. Новајлијата на визардси Рашар Луис оствари забележа 21 поен и 12 скока.

Чикаго дури во продолжението славеше над Детроит со 95:92. Карлос Бузер имаше учинок од 32 поена и 11 скока, дабл-дабл ефект и за Дерик Роуз (23 коша, 12 скока, 8 асистенции) што е негово најдобро постигнување во кариерата. Добар меѓу пистонси беше Трејси МекГрејди со 17 поени и 6 додавања.

Резултати: Лос Анџелес Клиперс - Феникс 108:103, Минесота - Кливленд 98:97, Чикаго - Детроит 95:92 (по продолженија), Мемфис - Индијана 104:90, Њу Орлеанс - Атланта 93:86, Сан Антонио - Вашингтон 94:80, Филаделфија - Денвер 95:89.