И ММФ контра Владата, БДП ќе порасне за 1,2 отсто

Најновите проекции на Фондот се спротивни на оние на македонските власти, кои се упорни дека ќе има раст од два отсто

Македонската економија годинава ќе порасне за 1,2 отсто, предвидува Меѓународниот монетарен фонд во својот најнов извештај. Во него, исто така, се вели дека наредната година нашата економија ќе порасне за три проценти. Во однос на стапката на инфлација ММФ пресметал дека во 2010 година таа ќе достигне 1,9 отсто, а в година три отсто.

Со овие проекции ММФ практично ги урива предвидувањата на нашата Влада, која опстојува на ставот дека годинава нашата економија, сепак, ќе достигне раст од два отсто, колку што изнесуваше и првичната проекција на ММФ за раст. Владата во нејзините прогнози не ја премисли ниту укажувањето на повеќе експерти дека, поради се' уште силното влијание на светската економска криза врз македонското стопанство, таквиот раст е научна фантастика.

За годинава ММФ прогнозира дека од земјите во регионот поголем раст на БДП од Македонија ќе имаат Србија со 1,5 отсто, Албанија 2,6, Косово 4,6 и Турција 7,8 отсто. ММФ во најновиот извештај предвидува дека Бугарија ќе има стагнација или раст од нула отсто, БиХ 0,5 отсто, додека Црна Гора ќе загази во минус од 1,8 отсто, а Хрватска во минус од 1,5 отсто.

За наредната година се предвидува растот на Албанија да изнесува 3,2 отсто, на БиХ три отсто, Бугарија два отсто, Хрватска 1,6 отсто, Косово 5,9 отсто, Црна Гора 4,5 отсто, Србија три отсто и на Турција 3,6 отсто.

За движењето на глобалната економија ММФ проценува дека во 2010 година тоа ќе порасне за 4,8 отсто, а во 2011 година за 4,2 процента. Економиите на државите во развој ќе забележат пораст од над седум проценти, а високоразвиените земји од 2,7 отсто. Во земјите од ЕУ, кои го користат еврото, годинава економијата ќе порасне за 1,7 отсто, а во 2011 година за 1,5 проценти.

Главниот економист на ММФ, Оливие Бланшар, смета дека е малку веројатно светот повторно да западне во рецесија, но оти кризата се' уште не е завршена. Најголем економски и социјален предизвик за глобалната и за националните економии ќе биде невработеноста.

ММФ истакнува дека се' уште не е време да се прекине со поддршката од државата, но оти е неопходно да заживее приватниот сектор, а владите да покажат дека имаат јасен пат за намалување на буџетските дефицити и излез од кризата.

Во извештајот се наведува дека финансискиот систем и натаму е слаба точка на глобалното економско закрепнување, по незавршеното подобрување на банкарскиот сектор и затоа се потребни натамошни реформи за регулирање на финансискиот систем. (А.С.)