Никој не знае зошто е убиен таксистот во Теарце

Два дена по мистериозното убиство на таксист во тетовското село Теарце, полицијата и Обвинителството ги истражуваат мотивите за грозоморниот чин. Како што дознаваме, на информативен разговор биле повикани две лица, но веднаш се пуштени на слобода.

„Засега нема осомничени, но интензивно се работи на расветлување на случајот“, велат од тетовската полиција. Според нив, сите полициски служби се ангажирани околу истрагата и се разговара со сите оние што би можеле да имаат некакви сознанија. Според првичните претпоставки на Обвинителството, се отфрла можноста за должничко-доверителски односи, а веројатно не станува збор ниту за користољубие или за грабеж, затоа што на таксистот не му биле одземени ниту парите ниту мобилниот.

Рафет Асани (52) беше пронајден во своето возило, избоден со нож по телото и оставен во близина на муслиманските гробишта во атарот на селото Теарце. Го пронашле случајни минувачи што работеле на нивите. Тој бил удиран по главата со тврд предмет и имал повеќе убоди по главата и на плеќите. (Х.Р.)