Велешката полиција поднесе кривична пријава против 11 велешани, главно, малолетници поради сомневање дека пред неколку дена го предизвикале инцидентот во училишниот двор на средното општинско училиште „Димитрија Чуповски“ во Велес кога беа нападнати две момчиња од Бузалково и едно од Горно Оризари.
Според пријавата, осомничените влегле во училишниот двор, застанале пред влезната врата и чекале да заврши седмиот час. Кога учениците почнале да излегуваат, пријавените се стрчале кон влезната врата и ги претепале трите момчиња, кои побараа помош во болница.
Како причина за инцидентот се наведува претходниот напад врз едно од пријавените момчиња, што го извршиле двајца тинејџери од Горно Оризари, кои не беа цел на одмаздничкиот напад. Тие од полицијата заработија прекршочна пријава. (Г.А.)
