Поглед

Галии за роденден

Деспина Трајковска

Таман почнаа да спласнуваат реакциите за „Скопје 2014“ и многумина се соживеаја со него, градоначалникот Коце Трајановски го размрда секојдневието со старо-новата идеја. Ќе ни' укотви сплавови, пардон, бродови на Вардар. Ќе стасаат налик на „Пиратите од Карибите“. Па, зошто да не ги дочекаме и нив.

Што вели градоначалникот, „доста е од стереотипи“. Кога можеше да се соживееме со палмите и плажите „а ла Рио“, да го прифатиме тркалото како тоа во Виена, ама нашево качено на мост, плус живите врби во Вардар - „македонски производ“, за два брода е смешно да се реагира... Згора на се' што тие „ќе помогнат за развој на Скопје“.

Да не беше смешно ќе беше трагично. Или, пак, обратно, кој како милува. Бродовите ќе станат јаве. И, ако некој му се смееше на Амди Бајрам кога еднаш рече дека ако е градоначалник ќе ставел брод во Вардар за долго сеќавање, сега треба капа да му симнувамд. Ако ништо друго за визионерство. Амди не се ни обиде да стане градски татко, ама... Не еден, туку си најми четири брода среде Охридското езеро и направи сунет за внук му Валентино. Сите го запаметија по тоа.

Така, и туристите привлечени од „Скопје 2014“ ќе ја запаметат нашата метропола. Можеби некој од нив ќе посака да си го прослави роденденот на оваа скопска атракција. Локалци сигурно ќе се журкаат, уште од сега се распрашувале кај Трајановски кога галиите ќе станат реалност. Дури и тој нема ништо против да ги изнајми за својот роденден.

Среќен и задоволен, во роденденски филм можеби и ќе си ја запее „не будите мене, мамуран сам ја од ракије љуте и од сплавова“, еден од препознатливите хитови по белградските сплавови. Во меѓувреме, некој ќе рече „кога е бал, нека е на вода“. Без коментар.