Бријаторе и Сајмондс си одат од Рено

Рено вчера се раздели со својот огнен тимски шеф Флавио Бријаторе и соопшти дека нема да ги оспори обвинувањата дека ја лажирале минатогодишната трка во Сингапур со наредбата за свој возач да се удри.

„ИНГ Рено Ф1-тим нема да полемизира со последните обвинувања од ФИА во врска со гран-прито во Сингапур 2008“, се вели во соопштението на тимот. „Сакаме да објавиме и дека извршниот директор Флавио Бријаторе и шефот на инженерите Пит Сајмондс си заминаа го напуштија тимот. До сослушувањето пред Светскиот совет за мотоспорт на ФИА на 21 септември тимот нема да дава дополнителни коментари“.

Бријаторе и Сајмондс требаше да излезат пред Интернационалната автомобилистичка федерација (ФИА) со одговор на обвинувањата дека пред една година во Сингапур му наредиле на својот тогашен возач Нелсон Пике да се удри и на тој начин да му помогне на тимскиот колега Фернандо Алонсо за да победи. ФИА има на располагање различни казни за измамничко однесување, вклучувајќи и исфрлање на екипата од шампионатот.

Пике (24) доби отказ од Рено во август, по што и' се обрати на ФИА, тврдејќи дека му било кажано кога и каде да се удри во текот на првата ноќна трка во Формула 1. Рено и Бријаторе возвратија со тужба за Бразилецот и за неговиот татко, трикратен светски првак и имењак, за лажно обвинување и за обид за уцена.

Италијанецот Бријаторе ја водеше екипата до две конструкторски и возачки титули со Фернандо Алонсо во 2005 и во 2006, а има титули и со Бенетон и Михаел Шумахер во 1994 и во 1995 година. Бизнис-партнерот на сопственикот на комерцијалните права за Формула 1, Берни Еклстоун, со кого се косопственици на англискиот фудбалски второлигаш Квинс Парк Ренџерс, Бријаторе е и водечка фигура во Асоцијацијата на тимовите во Формула 1 (ФОТА).