Мое ќоше

Кокошките почнаа да кукуригаат

Ерол Ризаов

Господ нека ја благослови Америка

Македонските златни кокошки почнаа да кукуригаат како петли. Уште не се исуши мастилото од минатонеделното ќоше посветено на нашите најпрофитабилни компании кои носат само златни јајца стаса новогодишна честитка до сите граѓани на Македонија о�� Министерството за правда на Америка. Само што некои наши големи правни експерти ми префрлија дека без доволно докази сум напишал за односот на државата во компаниите каде што е малцински партнер, дека „во најмала рака тој однос е коруптивен и партиски“, кога американското министерство и Комисијата за хартии од вредност соопштија дека „Дојче телеком“ и неговата филијала „Маѓар телеком“ потплатиле македонски политичари и претставници во текот на 2005 и 2006 година да го одолговлекуваат отворањето на пазарот на безжични телекомуникации и да ја спречуваат конкуренцијата во Македонија. „Дојче телеком“ и „Маѓар телеком“, сопственици на „Македонски телекомуникации“ и „Т-мобиле“, експресно се согласија да платат 95 милиони долари казна и да избегнат судска тужба. Со тоа не мора да ја признаат вината, бидејки спогодбата и милионите долари ставаат крај на истрагата против „Дојче телеком“ и „Маѓар телеком“.

Убаво. Сега очекувам дека и американското Министерство за правда и Комисијата за хартии од вредност ќе се соочат со тужбата на нашите правни експерти да приложат докази за вакво празнично вознемирување на македонската јавност. Види богати, при наше Министерство за правда, при наше Јавно обвинителство, при наша високопрофесионална и непартиска полиција и независно судство, при наша самостојна Антикорупциска комисија која не работи селективно и при слободни медиуми некои таму Амери ќе ни кажуваат дека Германците и Унгарците потплатиле македонски политичари. Тоа ти е директна атака врз независноста, суверенитетот и самостојноста на криминалците кои имаат своја држава. И додека нашите независни институции на системот ѓоамити пребројуваат од која партија политичарите 2005 и 2006 година повеќе ги ограбувале своите граѓани, еве уште неколку прашања со сиот ризик повторно да се соочам со недостиг од докази:

Што мислите зошто граѓаните на Македонија и при ваква сегашна конкуренција се' уште плаќаат најскапи сметки за телекомуникациски услуги. Дали некогаш ќе ги дознаеме имињата на потплатените и корумпирани политичари и комуникациски стручњаци. Дали некој македонски граѓанин или компанија ќе поднесе кривична тужба за штета што му е нанесена со спречување на конкуренцијата. Како ќе заврши целата оваа работа. И конечно зошто Америка ни го направи ова.

Засега со сигурност делумно се знае одговорот само на последното прашање. „Дојче телеком“ и „Маѓар телеком“ се огрешиле на американскиот закон за борба против корупцијата надвор од територијата на САД. Тој закон се применува за американските фирми, како и за странските компании што работат на подрачјето на САД. Во наведениот период 2005 и 2006 година со акциите на „Маѓар телеком“ се тргувало на Берзата во Њујорк. Доволно да се лапнат 95 милиони долари отштета за Америка оти се подмитиле македонски политичари што таму предизвикало некакви негативни последици. А, кај нас. А, ние. Има ли нешто за нас. Се разбира, директно или индиректно пак ќе ја платиме сметката и ќе си молчиме. Не е убаво да се вознемируваме и да истражуваме какви јајца несат нашите златни кокошки.

Замислете доколку рафинеријата „Окта“ направила некоја трансакција во Америка. Ако Американците и' стегнат една тужба. Колку ли таму има црно злато. Уште едно прашање пак без докази: зошто и покрај сите казни што ни ги изрекоа меѓународните судови поради „Окта“ со милионски износи и покрај најлошиот бензин далеку под европските стадарди и покрај загадувањето на човековата околина, за време на сите власти, оваа компанија трупа профити и не' труе спокојно.

Господ нека ја благослови Америка.