Американска вечера без ЕУ во Прага

Без заедничката надворешна политика на ЕУ Обама да знаел кого да го повика или покани на вечера

БРИСЕЛ - Одлуката на САД да не покани официјални претставници на ЕУ на настанот од најголемо безбедносно значење во Прага се гледа како ново одбивање на Брисел. Американскиот претседател Барак Обама во четвртокот на 8 април во чешкиот главен град го потпиша Договорот за намалување на нуклеарното оружје со неговиот руски колега, пред да биде домаќин на вечерата со 11 шефови на држави и влади од одбрани европски држави. На листата на гости беа претставници од Бугарија, Хрватска, Република Чешка, Естонија, Унгарија, Летонија, Литванија, Полска, Романија, Словачка и Словенија. Меѓутоа, не беа поканети претставници на ЕУ, како новиот комесар за надворешни односи на Унијата, Кетрин Ештон, или новиот претседател Херман ван Ромпуј.

Белата куќа соопшти дека вечерата имала цел Обама да ги разбере „единствените перспективи“ на поранешните комунистички и советски држави во однос на безбедносните прашања во Европа. Ова се случува во услови на загрижености во источните метрополи на ЕУ дека САД им дава предност на односите со Москва, додека, пак, се повлекува од плановите за изградба на нови воени бази во Полска и Чешка. Исто така, настанот во Прага доаѓа во време откако Обама го откажа самитот САД - ЕУ кој требаше да се случи во мај во Мадрид. Официјални претставници на САД и ЕУ подоцна наведоа дека идните самити треба да се одржуваат само „кога и двете страни сметаат дека е потребен таков“ наместо на редовна база.

Развојот на настаните го засрами шпанското претседателствување со ЕУ и иницира прашање околу тоа дали Вашингтон продолжува да ја гледа ЕУ како важен играч на светската сцена. Европската комисија ја отфрли важноста на вечерата во Прага во официјалното соопштение издадено во четвртокот. „Има редовни контакти меѓу САД и другите земји-членки и не треба да интервенираме во сите нив и да бидеме поканети на сите тие средби. Па, секако, тоа не е негативна информација за нас“, изјави портпаролот на комисијата.

На прашањето од страна на „ЕУ обзервер“ дали настанот во Прага ризикува да биде виден како уште една шлаканица за ЕУ, еден американски дипломат изјави: „И претседателот и државниот секретар зборуваа за големата важност што ЕУ ја има за САД. Не се обидуваме да одвратиме или да се откажеме од еден однос, но во исто време да имаме друг“.

Оваа вечера уште еднаш укажува на фактот дека Европската унија треба да ја направи реалност заедничката надворешна политика, за претседателот Обама да знае кого да го повика или покани на вечера. (ЕУ обзервер)