Карзаи удри по Русите за учеството во рацијата во Авганистан

КАБУЛ - Авганистанскиот претседател Хамид Карзаи ја критикуваше првата заедничка операција на руските и на американски агенти за уништување лаборатории за дрога во неговата земја. Карзаи изјави дека не бил информиран за учеството на Русија, чувствително прашање во Авганистан откако пред 21 година заврши советската окупација. Тој го нарече ова непочитување на авганистанскиот суверенитет и меѓународното право.

Русија соопшти дека повеќе од еден тон хероин и опиум, со улична вредност од 250 милиони долари, е уништен во рацијата. Официјални лица во Москва и порано ги обвинуваа коалициските сили во Авганистан дека не прават речиси ништо за борба против дрогата и со тоа помагаат во поддршката на околу 2,5 милиони зависници од хероин во Русија. Во петокот првиот човек на руската агенција за контрола на наркотици изјави дека неговите агенти во четвртокот учествувале во операција за уништување на „голем центар“ за производство на дрога, на околу пет километри од пакистанската граница близу градот Џалалабад.

Висок извор во делегацијата на рускиот претседател Дмитриј Медведев, кој се наоѓа во посета на Виетнам, вчера за новинската агенција АФП изјави дека реакцијата на Кабул на операцијата за борба против дрогата е „едноставно неочекувана и несфатлива“, бидејќи „авганистанското Министерство за внатрешни работи учествуваше во таа операција“. (Би-Би-Си)