Битола

Контрола на загубите во водоводот

БИТОЛА - Јавното комунално претпријатие го пушти во функција системот „Скада“, кој во првата фаза ќе обезбеди контрола на загубите на вода во мрежата и поефикасен сервис за граѓаните. Станува збор за инвестиција на „Водовод“ од околу 200.000 евра.

„Преку овој систем и мерните инструменти за вода што се наоѓаат во филтер-станицата „Дихово“, информациите ќе се собираат на едно место. Системот веднаш ќе ги детектира загубите на вода, кои моментално се движат и до 50 отсто. Поточно ќе се знае на кое место во градот има загуба на вода за веднаш да се интервенира“, објаснува Зоран Илиоски, директор на ЈП „Водовод“.

Инаку, жителите на Битола се можеби меѓу ретките во државата што досега не останале жедни за вода, но затоа плаќаат прилично висока цена за потрошен кубик. Од почетокот на оваа година, со објаснување дека ЈП „Водовод“ треба да инвестира во застарениот систем, водата во Битола се покачи за неверојатни 117 проценти. Така, еден кубен метар граѓаните го плаќаа 30,25 денари, а претпријатијата 45 денари.

По континуираните критики од граѓаните дека водата енормно поскапе во година на рецесија, „Водовод“ реши да се коригира. Но, намалувањето го направи само за сметките за домаќинства, и тоа за 20 проценти. Еден кубен метар сега чини 24,25 денари. Претпријатијата и натаму ќе плаќаат висока цена на водата. (А.Б.)