За маалските и за политичките тегобности
Завчера се одржа промоција на новата книга на Владимир Плавевски - „Цена од Ново маало“
Пред голем број пријатели, вљубеници во пишаниот збор и во уметноста воопшто, завчера во поранешната „Румба кафана“ во познатото скопско Ново маало, се одржа промоцијата на најновата книга на д-р Владимир Плавевски - „Цена од Ново Маало“.
Плавевски на домашната културна јавност и досега и е познат по своите мошне интересни книги раскази, како „Играч на фанта“, „Амкање“, „Ловец на самовили“ и „Поплава“. Па и овде, во „Цена од Ново маало“, тој „страда“ од автобиографска носталгија и не' опсипува со лавина субјективни прикази на галерија ликови спикани во скопскиот кварт наречен Ново маало. Книгата отсликува едно исклучително општествено-политичко невреме – „Информбировска 48. година“ кога тогашната политичка власт запаѓа во политичкиот раскол со премоќниот комунистички СССР на генералисимусот Сталин. Романескните случувања пребоени со љубовен заплет и задоени со политика резултира со губитништво во сите пори на маалското битисување. Главниот водечки лик на романот, неговата баба Цена со својот стамен авторитет успева да владее со маалските и политичките тегобности...
„Цена од Ново маало“ ја издаде Дирекцијата за култура и уметност на Скопје. Ја промовираше Сашко Насев, а извадоци од книгата читаше актерот Кирил Ристоски. |
