Пешачка зона пред Собрание?

Советникот Ѓуревски побара летово да се затвори улицата пред Собранието од 22 ч. до 1 часот по полноќ

Улицата пред републичкото Собрание од раскрсницата кај Градска болница до „Палома бјанка“ летно време да биде пешачка зона и целосно да се затвори за сообраќај во ноќните часови, од 21 или 22 часот до 1 часот по полноќ. Оваа идеја вчера на градоначалникот Коце Трајановски му ја предложи советникот Тони Ѓуревски од ВМРО-ДПМНЕ. Тој смета дека �� лето на Скопје му е потребна пешачка зона во центарот, по примерот на неколку европски градови. Згора на се' и затоа што сега централното градско подрачје доби низа атракции, а граѓаните сакаат да стасаат до нив и да се сликаат без притоа да се на удар на сообраќајниот метеж.

„Сметам дека иницијативата е издржана, со оглед на тоа дека нема потреба од инвестирање, а постои и веќе проверен сообраќаен режим што би се вовел во случај улицата да се затвори. Улицата ‘Даме Груев‘ и сообраќајната опција преку мостот ‘Гоце Делчев‘ се доволни сообраќајот во тој дел да циркулира без никаков проблем“, посочи вчера Ѓуревски на седницата на Советот на Град Скопје наменета за советнички прашања и предлози до градоначалникот и до службите.

Трајановски не го искажа своето мислење за ова прашање, туку одговорот му го препушти на раководителот за сообраќај.

„Во тој дел, согласно со ДУП, е предвидено булеварско решение, а не пешачка зона, која точно е исцртана во секој урбанистички план. Конкретно за овој реон не е предвидено такво нешто. Според мене, недозволиво е да ја затвориме улицата, бидејќи таа е една од главните сообраќајници во центарот“, рече Зоран Дамјановски од Градскиот сектор за сообраќај. (Дс.Т.)