Нафтата 91 долар за барел

Нафтата поевтини на Берзата во Њујорк за малку повеќе од 91 долар за барел, имајќи ги предвид прогнозите на светската побарувачката на оваа суровина од страна на земјите извознички на нафта (ОПЕК) и од страна на (ИЕА) Меѓународната агенција за енергетика.

„Лесната“ нафта во Америка на Берзата во Њујорк се намали за 35 центи и сега барел нафта изнесува 91,19 долари, додека, пак, на лондонската Меѓународна берза европската нафта „брент“ поскапи за 11 центи и сега изнесува 97,54 долари за барел.

Врз цената на нафтата малку влијаеше месечниот извештај на ОПЕК, со кој се предвидува зголемена глобална побарувачка на нафта што ја произведува овој картел. Очекувањата од страна на ОПЕК за оваа година се дека побарувачката ќе изнесува 29,4 милиони барели дневно, или 0,4 милиони барели дневно повеќе отколку минатата година и 0,2 милиона барели повеќе во однос на претходните процени.

Меѓународната агенција за енергетика (ИЕА), исто така, ја зголеми побарувачката за црното злато во светот оваа година врз основа на заздравувањето на глобалниот економски пораст и ниските температури на северната хемисфера, со што ќе се зголеми потрошувачката на маслото за ��омаќинство. (Ек.Р.)