Од денеска на земјава и' се достапни 480 милиони евра од ММФ

Бордот на Фондот се очекуваше доцна синоќа да ја потврди одлуката за 480 милиони евра од кредитот за Македонија

Од денеска и официјално 480 милиони евра од Меѓународниот монетарен фонд ќе и' бидат достапни за користење на Македонија. Бордот на ММФ и формално се очекуваше доцна синоќа да ја потврди одлуката, за која никој во меѓувреме не отвори дилема дали ќе биде позитивна или негативна. Засега е извесно само дека во Вашингтон ќе биде дадена виза 480 милиони евра од кредитот за претпазливост да и' бидат достапни на државава откако Владата и ММФ во декември си подадоа рака за користење на новиот инструмент.

Тоа значи дека од денеска земјава ќе може да ги користи парите од Фондот, иако Владата во изминатиот период постојано укажуваше дека ќе се труди да не ги троши, освен ако има ризик за буџетот, а ќе ги чува за подобрување на имиџот на земјата. При користењето на овој нов инструмент, кој не е класичен аранжман, Фондот на секои шест месеци ќе ја контролира земјава дали води здрава економска политика. Каматата за овие пари е 1,3 проценти. Со овој потег, власта смета дека ќе прати порака до инвеститорите што би требало да ни ја подобри позицијата пред издавањето еврообврзница, а што би помогнало да се спушти каматата. „Во првото тримесечје од годинава се прави мониторинг на состојбата на меѓународните финансиски пазари, ќе се разгледуваат условите, по што ќе се донесе конечна одлука за издавањето еврообврзница“, велат од Министерството за финансии. Нејзиното емитување, сепак, зависи од цената, односно каматата што може да се постигне на европските пазари. Моментално каматата е прилично висока и се движи околу 7-8 отсто. Лани еврообврзници издадоа Албанија по цена од 7,5 проценти и Црна Гора со слична камата. Познавачите велат дека се' уште важат овие камати и засега нема промена на состојбите на пазарите.

Власта за годинава вети дека со надворешно задолжувања планира да го покрива буџетскиот дефицит, што подразбира помало задолжување на домашниот пазар, што не беше случај минатата година. Но, и покрај ваквите ветувања, уште во првите денови од годинава Министерството за финансии повторно продолжи со старата практика и на вонредни аукции се задолжи за нови 38 милиони евра. (С.М.)