На Исланд можна нова вулканска ерупција

Гетеборг – Неколку месеци по ерупцијата на вулканот Ејафјалајокул, која беше проследена со хаос во воздушниот сообраќај, можно е нов вулкан да се разбуди на Исланд, според експертите при исландскиот Метеоролошки институт.Овој пат станува збор за вулканот Гримсвотн под глечерот Ватнајокул, кој покажува знаци на раздвижување, јави шведската телевизија СВТ.

Од Ватнајокул е забележано сливање на вода минатата недела, откако се појавија повеќе знаци дека нешто се случува.

При вулканската ерупција на Исланд во март годинава околу 700 лица беа евакуирани, а исландската влада интервенираше со пет милиони евра за санирање на предизвиканите штети.

Тоа, сепак, е капка во море во споредба со сите милијарди што ги изгубија воздухопловните компании додека авионите беа принудени да останат приземјени на пистите поради ширењето на вулканската пепел во атмосферата.