Втора фаза од едношалтерскиот систем во Царина

Царината работи на воведување на втората фаза од едношалтерскиот систем во земјава, поточно се завршува техничката спецификација за додавање нови дозволи, кои економските оператори ќе можат да ги користат електронски. Овој систем има основна цел да ја олесни трговијата на стоки преку централизирање на сите постапки во еден систем. Едношалтерскиот систем во Македонија во минатото покажувал одредени грешки, но, во последно време тие се сведени на минимум, а Царинската управа е администратор на системот во кој се вклучени и други 15 државни институции.

Според директорот на македонската царина, Ванчо Каргов на „Третата конференција за ЈИЕ за олеснување на трговијата, едношалтерски систем и хармонизација на трговските податоци“, што вчера се одржа во Скопје, најинтересна надградба на едношалтерскиот царински систем во Македонија е издавањето најразлични видови транспортни дозволи од Министерството за транспорт на граничните премини.

Претставникот на Економската комисија на Обединетите нации за Европа, Марио Апостолов како многу значаен чекор го оцени воведувањето едношалтерски систем во Македонската царина, кој е прв во регионот.

„Тоа е само првиот чекор, но целиот процес се состои од повеќе чекори, во институции и со документи. Клучното нешто во креирањето на едношалтерскиот систем е соработката меѓу институциите. Царината можеби е главната институција за имплементација на системот, но секако мора да постои соработка и со останатите државни институции, како што се министерствата за транспорт, за земјоделство, граничната полиција и други, што претставува голем предизвик не само во Македонија, туку во секоја земја“, рече Апостолов, нагласувајќи дека институциите, вклучени во системот покрај со Царината треба да соработуваат и меѓу себе.

За Апостолов развојот на едношалтерскиот систем претставува 80 отсто преговори и договори меѓу институциите и само 20 отсто развој на софтверот и хармонизација на податоците.

„Тоа е многу важен организациски и политички процес што ќе води кон подобро администрирање и помал степен на корупција во меѓународната трговија“, рече Апостолов.

Една од целите на конференцијата е преку размена на информации меѓу деловната заедница и државните органи, да се идентификуваат предизвиците поврзани ��о воведувањето на едношалтерскиот систем во државите во регионот, како и нивното регионално поврзување.

Се очекува на конференција да бидат определени и идните чекори во создавањето услови за заемно поврзување на националните едношалтерски системи во рамките на интегрирањето во Европската унија. (А.С.)